Ikki yil oldin ipoteka tizimi tubdan isloh qilinganiga qaramasdan, hali o‘z yechimini topmagan ko‘plab masalalar mavjud. Bu haqda prezident Shavkat Mirziyoyev raisligida o‘tkazilayotgan ipoteka va qurilish materiallari mavzusidagi videoselektor yig‘ilishida aytib o‘tildi.
Davlat rahbari tomonidan bundan ikki yil oldin ipoteka tizimi tubdan isloh qilingani, birinchi navbatda, aholiga o‘zlari istagan uy-joyni sotib olish imkoniyati yaratilgani qayd etildi. Natijada sohaga sifat va raqobat kirib keldi, hududlarda zamonaviy arxitektura yechimlariga ega loyihalar paydo bo‘lgani aytildi. Shu orqali ipoteka dasturlari doirasida yiliga 35 ming xonadonli uy-joylar qurilmoqda. Bu oldingi yillarga nisbatan 2 baravar ko‘p degani.
Shunday bo‘lsa-da, yangi tizimda hali o‘z yechimini topmagan ko‘plab masalalar mavjudligi ta’kidlandi.
“Masalan, ipoteka bozorida qurilayotgan uy-joylar soni talabga nisbatan ancha kam. Xususan, Xonqa tumanida 5 mingta yangi uy-joyga talab bo‘lsa-da, kelgusi yilda atigi 464 ta (talabning 9 foizi) uylar qurish reja qilingan.
Bundan tashqari, bugungi kunda joylashgan joyi yoki narxi aholiga nomaqbul bo‘lgani uchun qiymati 255 milliard so‘mlik 950 ta qurilgan xonadon sotilmasdan turibdi. Surxondaryoda – 292 ta, Sirdaryoda – 189 ta, Qoraqalpog‘istonda – 174 ta, Farg‘onada – 167 ta”, — deydi prezident.
Ipoteka uchun budjetdan ajratilgan 1,1 trillion so‘m subsidiyalardan 220 milliard so‘m (20 foiz) ishlatilgani, respublika bo‘yicha 36 mingdan ziyod ijobiy xulosasi bor oilalarga 900 milliard so‘mdan ziyod subsidiyalar to‘lanmay turilgani tanqid qilindi. Buning sababi aholi tomonidan talab yuqori bo‘lgan o‘rta me’yordagi uylar bo‘yicha quruvchilar bozorga yetarli taklif chiqarmayotganida ekanligi bildirildi.
Samarqand viloyatida hokimiyat tashabbus qilib, loyihachi, quruvchi va bankni “boshini birlashtirib”, hamyonbop uylarni qurishni tashkil etgani misol sifatida keltirilib, bu orqali subsidiyadan foydalanish va kreditlarni o‘zlashtirishning eng yuqori ko‘rsatkichi Samarqandda (kredit – 85 foiz, subsidiya – 60 foiz) qayd etilgani aytildi.
“Nima uchun Qoraqalpog‘iston, Navoiy, Sirdaryo, Xorazm va Toshkent viloyati (o‘zlashtirish 5 foizdan past) rahbarlari ishlarni bunday tashkil eta olmaydi?”, – deydi davlat rahbari.
Izoh (0)