Шавкат Мирзиёев: «Жойлашган жойи ёки нархи аҳолига номақбул бўлгани учун 255 млрд сўмлик янги қурилган 950 та хонадон сотилмасдан турибди»

Икки йил олдин ипотека тизими тубдан ислоҳ қилинганига қарамасдан, ҳали ўз ечимини топмаган кўплаб масалалар мавжуд. Бу ҳақда президент Шавкат Мирзиёев раислигида ўтказилаётган ипотека ва қурилиш материаллари мавзусидаги видеоселектор йиғилишида айтиб ўтилди.

Давлат раҳбари томонидан бундан икки йил олдин ипотека тизими тубдан ислоҳ қилингани, биринчи навбатда, аҳолига ўзлари истаган уй-жойни сотиб олиш имконияти яратилгани қайд этилди. Натижада соҳага сифат ва рақобат кириб келди, ҳудудларда замонавий архитектура ечимларига эга лойиҳалар пайдо бўлгани айтилди. Шу орқали ипотека дастурлари доирасида йилига 35 минг хонадонли уй-жойлар қурилмоқда. Бу олдинги йилларга нисбатан 2 баравар кўп дегани.

Шундай бўлса-да, янги тизимда ҳали ўз ечимини топмаган кўплаб масалалар мавжудлиги таъкидланди.

«Масалан, ипотека бозорида қурилаётган уй-жойлар сони талабга нисбатан анча кам. Хусусан, Хонқа туманида 5 мингта янги уй-жойга талаб бўлса-да, келгуси йилда атиги 464 та (талабнинг 9 фоизи) уйлар қуриш режа қилинган.

Бундан ташқари, бугунги кунда жойлашган жойи ёки нархи аҳолига номақбул бўлгани учун қиймати 255 миллиард сўмлик 950 та қурилган хонадон сотилмасдан турибди. Сурхондарёда – 292 та, Сирдарёда – 189 та, Қорақалпоғистонда – 174 та, Фарғонада – 167 та», — дейди президент.

Ипотека учун бюджетдан ажратилган 1,1 триллион сўм субсидиялардан 220 миллиард сўм (20 фоиз) ишлатилгани, республика бўйича 36 мингдан зиёд ижобий хулосаси бор оилаларга 900 миллиард сўмдан зиёд субсидиялар тўланмай турилгани танқид қилинди. Бунинг сабаби аҳоли томонидан талаб юқори бўлган ўрта меъёрдаги уйлар бўйича қурувчилар бозорга етарли таклиф чиқармаётганида эканлиги билдирилди.

Самарқанд вилоятида ҳокимият ташаббус қилиб, лойиҳачи, қурувчи ва банкни «бошини бирлаштириб», ҳамёнбоп уйларни қуришни ташкил этгани мисол сифатида келтирилиб, бу орқали субсидиядан фойдаланиш ва кредитларни ўзлаштиришнинг энг юқори кўрсаткичи Самарқандда (кредит – 85 фоиз, субсидия – 60 фоиз) қайд этилгани айтилди.

«Нима учун Қорақалпоғистон, Навоий, Сирдарё, Хоразм ва Тошкент вилояти (ўзлаштириш 5 фоиздан паст) раҳбарлари ишларни бундай ташкил эта олмайди?», – дейди давлат раҳбари.