Surxondaryoda chegarani noqonuniy ravishda buzib, Afg‘oniston hududiga o‘tishga uringan xorijlik fuqaro qo‘lga olindi, deb xabar beradi viloyat IIB axborot xizmati.
Ma’lum qilinishicha, 26-noyabr kuni soat 19:00 larda Surxondaryo viloyati DXX Chegara qo‘shinlari harbiy qism chegara naryadi va tezkor xodimlari tomonidan davlat chegarasini noqonuniy kesib o‘tishga uringan shaxs to‘xtatilgan. To‘xtatilgan shaxs T.M. ismli Fransiya fuqarosi bo‘lib, u O‘zbekistondan Afg‘onistonga Termiz tumani hududidagi temiryo‘l orqali piyoda chiqib ketmoqchi bo‘lgan.
Voqea joyiga soat 20:30 larda Kontrabandaga qarshi kurashish va bojxona auditi bo‘limi hamda Surxondaryo viloyati IIB Jinoyat qidiruv boshqarmasi xodimlari yetib kelgan. Ular fuqaroni xolislar ishtirokida bojxona nazoratidan o‘tkazganida, unga tegishli bo‘lgan kulrang ryukzak ichidan 26 dona Topalgic 50 mg tramadol nomli tabletkalar borligi aniqlab, daliliy ashyo sifatida olib qo‘yilgan.
Mazkur holat yuzasidan tergovga qadar surishtiruv ishlari viloyat Bojxona boshqarmasi xodimlari tomonidan olib borilmoqda.
Avvalroq Samarqandda DXX 1700 dona psixotrop dori vositasini 2 ming dollarga sotmoqchi bo‘lgan shaxslarni qo‘lga olgani, Toshkentda 8145 dona “Tropikamid” va boshqa kuchli ta’sir qiluvchi dori vositalarining noqonuniy aylanmasiga chek qo‘yilgani to‘g‘risida xabar berilgandi.
Izoh (0)