1-noyabr kuni Qirg‘iziston poytaxti Bishkekda muxolifatdagi “Ota makon” partiyasi yetakchisi Omurbek Tekebayevga hujum uyushtirildi. Bu haqda partiya bosh shtabiga tayanib, “TASS” xabar berdi.
“Bir nechta niqobli kishi shahar markazida Tekebayevga hujum qilib, ko‘zoynagini sindirgan va telefonini tortib olgan”, — dedi partiya vakili. Uning so‘zlariga ko‘ra, siyosatchi jiddiy jarohat olmagan.
Tekebayevning o‘zi hujumni siyosiy faoliyati bilan bog‘lagan. “Mamlakatda bir-biriga zid qarashlarga barham berishga urinilmoqda”, — dedi u jurnalistlarga. Tekebayev, shuningdek, hujumchilarni uning buyumlarini qaytarishga chaqirdi.
28-noyabr kuni Qirg‘izistonda Oliy Kengashga (parlament) saylovlar bo‘lib o‘tdi. Dastlabki ma’lumotlarga ko‘ra, parlamentga oltita partiya o‘tadi: “Ota yurt Qirg‘iziston” (ayni vaqtda mamlakatdagi hukmron partiya), “Ishonch”, “Uyg‘unlik”, “Alyans” muxolifat partiyasi, “Yagona Qirg‘iziston” va “Imon nuri” partiyalari.
“Ota Makon” parlamentga kirish uchun zarur miqdordagi ovozlarni to‘plagani yo‘q. Saylovchilarning taxminan 35 foizi ovoz berishda qatnashgan, ovozlarni qo‘lda sanash davom etmoqda.
28-noyabr kuni kechqurun ovozlarni elektron hisoblash vaqtida saylov komissiyasining saytida nosozlik kuzatildi, u bir necha daqiqa ishlamay qoldi. Qayta ishga tushgandan so‘ng, saytda avvalgi versiyadan farq qiladigan ma’lumotlar paydo bo‘ldi. MSK veb-saytidagi nosozlik tufayli o‘nta partiya go‘yo jami 150 foizdan ortiq ovoz to‘plab, parlamentga kirgani haqida ma’lumot paydo bo‘lgan. MSK bu operatorning texnik xatosi ekaniga va tezda tuzatilganiga ishontirdi. Ushbu holat bir qator mag‘lub bo‘lgan partiyalar, jumladan “Ota Makon” vakillarining ovoz berish natijalarini tan olishdan bosh tortishiga sabab bo‘ldi.
Avvalroq parlament saylovlari vaqtida “Ordo” partiyasi yetakchisi Mirbek Miyarov bedarak yo‘qolgani xabar qilindi. U saylovda ovoz berganidan keyin g‘oyib bo‘lgan. Miyarovni qidirish ishlari deyarli ikki sutka davom etgan. 30-noyabr kuni uning o‘zi aloqaga chiqib, tog‘da ko‘ngilsizlikka uchraganini ma’lum qilgan.
Eslatib o‘tamiz, bir yil avval oktabr oyida Qirg‘izistonda parlament saylovlari bo‘lib o‘tgan, keyinchalik Qirg‘iziston Markaziy saylov komissiyasi Bishkekda ommaviy norozilik namoyishlari boshlanishiga sabab bo‘lgan parlament saylovlari natijalarini haqiqiy emas deb topgandi. 2021-yil avgustda Qirg‘iziston prezidenti Sadir Japarov 28-noyabr kuni Respublika parlamenti deputatlari saylovini o‘tkazish to‘g‘risida farmonni imzolagan.
Izoh (0)