Dunyoning qimmat shaharlari reytingida Tel-Aviv birinchi o‘rinni egalladi. Toshkent yashash uchun eng arzon shaharlar uchtaligidan joy oldi. Reyting Britaniyaning The Economist jurnali analitika bo‘limi – Economist Intelligence Unit (EIU) tomonidan tuzilgan.
“Tel-Aviv ilk bor reytingda birinchi o‘rinni egalladi, o‘tgan yili u beshinchi o‘rinda edi. Tel-Avivning bunday ko‘tarilishi, avvalo, Isroil pul birligi shekelning AQSh dollariga nisbatan kuchini aks ettiradi”, — deyiladi EIU matbuot bayonotida.
Reytingdagi ikkinchi o‘rindan Parij, undan keyin Singapur joy olgan. To‘rtinchi va beshinchi o‘rinlarini mos ravishda Syurix va Gonkong egallagan. Dunyoning eng qimmat shaharlari 10 taligiga Nyu-York, Jeneva, Kopengagen, Los-Anjeles va Osaka ham kiradi.
Hisobotning ochiq qismida o‘tgan yil davomida reytingda eng ko‘p pog‘onaga ko‘tarilgan shaharlar ham sanab o‘tilgan. Xususan, ushbu ma’lumotlarga ko‘ra, Tehron 79-o‘rindan 29-o‘ringa ko‘tarilgan. Tehronda yashash narxining oshishi “ta’minot bilan bog‘liq qiyinchiliklar, tovarlar tanqisligi va AQSh sanksiyalari qaytganidan keyin import narxlarining oshishi” bilan izohlanadi. Kiyev bir yil ichida 101-o‘rindan 88-o‘ringa, Moskva esa 106-o‘rindan 96-o‘ringa ko‘tarildi.
EIU yiliga ikki marta dunyoning 173 ta shahri uchun yashash qiymati indekslarini hisoblab chiqadi. Mutaxassislar oziq-ovqat, kiyim-kechak va uy-joy ijarasi kabi yuzlab tovar va xizmatlarning narxlarini ko‘rib chiqadi.
Iyun oyida Mercer xalqaro konsalting kompaniyasi chet ellik ishchilar yashashi uchun eng qimmat bo‘lgan dunyo shaharlari reytingini tuzgan edi. Ashxobod xorijliklar yashashi uchun eng qimmat shahar deb topilgan, Toshkent esa eng arzon shaharlardan biri bo‘lgan.
The Economist tomonidan 2020-yilning mart oyida e’lon qilingan ro‘yxatda Toshkent 132-o‘rinni egallab, eng arzon shaharlar qatoridan joy olgandi, noyabr oyidagi reytingda ham Toshkent 132-o‘rinni saqlab qolgan.
Izoh (0)