Farg‘ona va Buxoroda fuqarolarni Koreya va Avstraliyaga yuborishni va’da qilib, firibgarlik yo‘li bilan pul olgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Departament hamda DXXning Farg‘ona shahar bo‘limlari tomonidan fuqarolarning huquq va manfaatlarini himoya qilish yuzasidan o‘tkazilgan tezkor tadbirda, M.X. fuqaro M.ning ishonchiga kirib, uni Koreyaga ishga jo‘natish uchun vizalarini tezlashtirib olib berish evaziga 2 000 dollarni olgan vaqtida ashyoviy dalillar bilan ushlangan.
Bundan tashqari, M.X. M.ning ukasi J.ni ham Koreyaga ishga jo‘natish va viza hujjatlarini tezlashtirib olib berish evaziga 5 500 dollarni qo‘lga kiritgani aniqlangan.
Departamentning Buxoro shahar bo‘limi tomonidan o‘tkazilgan tergovga qadar tekshiruvda, fuqarolar M.A. va Sh.A. fuqaro S. va boshqalarning ishonchiga kirib, ularga Avstraliyaga borish uchun sayyohlik vizasini tayyorlab berishni va’da qilib, jami 6 nafar fuqaroning 39 ming dollar va 26,4 million so‘mni firibgarlik yo‘li bilan qo‘lga kiritgani aniqlangan.
Mazkur holatlar yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)