Namangan shahrida 22—27-noyabr kunlari O‘zbekiston—Tojikiston qo‘shma demarkatsiya komissiyasi ishchi guruhining navbatdagi yig‘ilishi bo‘lib o‘tdi, deb xabar qildi Tojikiston tashqi ishlar vazirligi.
Ma’lum qilinishicha, muzokaralarda demarkatsiya masalalari muhokama qilingan va o‘zbek-tojik chegarasining demarkatsiya chizig‘i loyihasi bo‘yicha o‘zaro kelishilgan takliflar tayyorlangan.
Qayd etilishicha, uchrashuv do‘stlik va yaxshi qo‘shnichilik ruhida o‘tgan. Uchrashuv yakunlari bo‘yicha tegishli bayonnoma imzolangan.
“Ishchi guruhlarning navbatdagi majlisi Tojikiston hududida bo‘lib o‘tadi”, — deyiladi xabarda.
Eslatib o‘tamiz, 17—22-may kunlari Tojikistonning Xo‘jand shahrida O‘zbekiston va Tojikiston hukumat delegatsiyalari ishchi guruhlarining demarkatsiya qo‘shma komissiyasi doirasidagi yig‘ilishi bo‘lib o‘tgandi. Uchrashuvda o‘zbek-tojik davlat chegara belgilarini o‘rnatish bo‘yicha fikr almashilgan.
Bundan tashqari, O‘zbekiston va Qozog‘iston davlat chegarasini demarkatsiya qilish masalasini muhokama qilgani, O‘zbekiston—Qirg‘iziston chegarasini delimitatsiya va demarkatsiya qilish bo‘yicha qirg‘iz hukumati delegatsiyasi rahbari Toshkentga kelgani xabar qilingan.
Izoh (0)