Фарғона ва Бухорода фуқароларни Корея ва Австралияга юборишни ваъда қилиб, фирибгарлик йўли билан пул олган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Департамент ҳамда ДХХнинг Фарғона шаҳар бўлимлари томонидан фуқароларнинг ҳуқуқ ва манфаатларини ҳимоя қилиш юзасидан ўтказилган тезкор тадбирда, М.Х. фуқаро М.нинг ишончига кириб, уни Кореяга ишга жўнатиш учун визаларини тезлаштириб олиб бериш эвазига 2 000 долларни олган вақтида ашёвий далиллар билан ушланган.
Бундан ташқари, М.Х. М.нинг укаси Ж.ни ҳам Кореяга ишга жўнатиш ва виза ҳужжатларини тезлаштириб олиб бериш эвазига 5 500 долларни қўлга киритгани аниқланган.
Департаментнинг Бухоро шаҳар бўлими томонидан ўтказилган терговга қадар текширувда, фуқаролар М.А. ва Ш.А. фуқаро С. ва бошқаларнинг ишончига кириб, уларга Австралияга бориш учун сайёҳлик визасини тайёрлаб беришни ваъда қилиб, жами 6 нафар фуқаронинг 39 минг доллар ва 26,4 миллион сўмни фирибгарлик йўли билан қўлга киритгани аниқланган.
Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)