Joriy yilning 25—26-noyabr kunlari Chirchiq shahridagi O‘zbekiston davlat jismoniy tarbiya va sport universitetida tarmoqlararo kooperatsiya sanoat yarmarkasi bo‘lib o‘tdi.
Unda respublika hududlaridan jami 978 nafar mahalliy ishlab chiqaruvchi 4 ming 421 turdagi mahsulotni namoyish etdi.
Tarmoqlararo sanoat yamarkasi respublikamizda yirik sanoat korxonalari va mahalliy ishlab chiqaruvchi korxonalar o‘rtasida kooperatsiya aloqalarini kengaytirish maqsadida o‘tkazilib kelinadi.
Olmaliq kon-metallurgiya kombinati bu kabi yarmarkalarda faol ishtirok etib keladi.
Yarmarkada tashkil etilgan kombinat stendida 85 dan ziyod ishlab chiqarilayotgan mahsulotlar hamda 75 dan ortiq mahsulotlar namunalari namoyish etildi.
OKMK tomonidan import qilinayotgan mahsulotlarni mahalliy ishlab chiqaruvchilarga to‘liq namoyish qilish maqsadida, ushbu yarmarka bilan bir vaqtning o‘zida Olmaliq shahrida ham yarmarka tashkil etildi.
Ushbu yarmarkaga respublikaning barcha ishlab chiqaruvchilari taklif etilib, ishtirokchilarga har bir import mahsuloti to‘g‘risida batafsil ma’lumot berildi hamda ularga oldindan tayyorlangan import mahsulotlari katalogi taqdim etildi. Yarmarka davomida ko‘plab mahalliy korxonalar bilan kelishuvlarga erishilib, o‘zaro hamkorlik aloqalari yo‘lga qo‘yildi.
Yarmarka davomida kombinat o‘zining ishlab chiqarish ehtiyojlari uchun zarur bo‘ladigan import mahsulotlarni mahalliy ishlab chiqaruvchilardan xarid qilish hamda kichik va o‘rta biznes bilan kooperatsiya aloqalarini kengaytirish maqsadida bir qator kelishuvlarga erishildi.
Mahalliylashtirish dasturi doirasida kombinat tomonidan 2021-yilda 87 ta loyiha asosida 210 milliard so‘mlik mahsulotlar ishlab chiqarilishi kutilmoqda.
Namangan viloyati “Inter texno prom” MChJ direktori Shuhrat Ismoilovning ma’lum qilishicha, OKMK tomonidan mazkur ko‘rgazmaga katta taraddud ko‘rilgan. Bu OKMK tomonidan Olmaliq shahrida o‘tkazilayotgan yarmarkaning stendlarida yaqqol namoyon bo‘lmoqda.
“Yarmarkada ishtirok etishimizdan asosiy maqsad, mahalliylashtirish dasturida ishtirok etish va ishlab chiqarayotgan mahsulotlarimiz uchun yangi xaridorlarni topishdan iborat. Hozigi kunda biz mahalliylashtirish dasturiga kiritilgan mahsulotlardan namunalar oldik. Ularning ba’zilarini korxonamizda ishlab chiqardik va OKMKga sinov uchun taqdim etdik. Sinovlardan muvaffaqiyatli o‘tgan mahsulotlarimiz uchun yangi 2022-yilda bir qator shartnomalarni imzolashni rejalashtirganmiz. Bugungi kunda OKMKga 30 turdagi mahsulotlarni yetkazib beryapmiz. Kelajakda yetkazib berilayotgan mahsulotlar sonini yanada ko‘paytirish niyatidamiz. Umid qilamizki, mahalliylashtirish dasturi yordamida o‘zimiz faoliyat olib borayotgan hudud — Namangan viloyati Uychi tumanining sanoat sohasidagi salohiyatini oshirishga, aholining bandligini ta’minlashga munosib hissamizni qo‘shamiz”, – dedi Shuhrat Ismoilov.
“Olmaliq KMK” AJ ushbu sanoat yarmarkasi doirasida mahalliy ishlab chiqaruvchilar bilan olib borilgan muzokaralar natijasiga ko‘ra, jami 220,3 milliard so‘mlik mahsulot xarid qilish bo‘yicha shartnomalar, shuningdek, jami 328,4 milliard so‘mlik zavod mahsulotlarini yetkazib berish bo‘yicha dastlabki shartnomalarni imzoladi.
Ma’lumot sheriklik huquqi asosida tayyorlandi.
Izoh (0)