Жорий йилнинг 25—26 ноябрь кунлари Чирчиқ шаҳридаги Ўзбекистон давлат жисмоний тарбия ва спорт университетида тармоқлараро кооперация саноат ярмаркаси бўлиб ўтди.
Унда республика ҳудудларидан жами 978 нафар маҳаллий ишлаб чиқарувчи 4 минг 421 турдаги маҳсулотни намойиш этди.
Тармоқлараро саноат ямаркаси республикамизда йирик саноат корхоналари ва маҳаллий ишлаб чиқарувчи корхоналар ўртасида кооперация алоқаларини кенгайтириш мақсадида ўтказилиб келинади.
Олмалиқ кон-металлургия комбинати бу каби ярмаркаларда фаол иштирок этиб келади.
Ярмаркада ташкил этилган комбинат стендида 85 дан зиёд ишлаб чиқарилаётган маҳсулотлар ҳамда 75 дан ортиқ маҳсулотлар намуналари намойиш этилди.
ОКМК томонидан импорт қилинаётган маҳсулотларни маҳаллий ишлаб чиқарувчиларга тўлиқ намойиш қилиш мақсадида, ушбу ярмарка билан бир вақтнинг ўзида Олмалиқ шаҳрида ҳам ярмарка ташкил этилди.
Ушбу ярмаркага республиканинг барча ишлаб чиқарувчилари таклиф этилиб, иштирокчиларга ҳар бир импорт маҳсулоти тўғрисида батафсил маълумот берилди ҳамда уларга олдиндан тайёрланган импорт маҳсулотлари каталоги тақдим этилди. Ярмарка давомида кўплаб маҳаллий корхоналар билан келишувларга эришилиб, ўзаро ҳамкорлик алоқалари йўлга қўйилди.
Ярмарка давомида комбинат ўзининг ишлаб чиқариш эҳтиёжлари учун зарур бўладиган импорт маҳсулотларни маҳаллий ишлаб чиқарувчилардан харид қилиш ҳамда кичик ва ўрта бизнес билан кооперация алоқаларини кенгайтириш мақсадида бир қатор келишувларга эришилди.
Маҳаллийлаштириш дастури доирасида комбинат томонидан 2021 йилда 87 та лойиҳа асосида 210 миллиард сўмлик маҳсулотлар ишлаб чиқарилиши кутилмоқда.
Наманган вилояти «Inter texno prom» МЧЖ директори Шуҳрат Исмоиловнинг маълум қилишича, ОКМК томонидан мазкур кўргазмага катта тараддуд кўрилган. Бу ОКМК томонидан Олмалиқ шаҳрида ўтказилаётган ярмарканинг стендларида яққол намоён бўлмоқда.
«Ярмаркада иштирок этишимиздан асосий мақсад, маҳаллийлаштириш дастурида иштирок этиш ва ишлаб чиқараётган маҳсулотларимиз учун янги харидорларни топишдан иборат. Ҳозиги кунда биз маҳаллийлаштириш дастурига киритилган маҳсулотлардан намуналар олдик. Уларнинг баъзиларини корхонамизда ишлаб чиқардик ва ОКМКга синов учун тақдим этдик. Синовлардан муваффақиятли ўтган маҳсулотларимиз учун янги 2022 йилда бир қатор шартномаларни имзолашни режалаштирганмиз. Бугунги кунда ОКМКга 30 турдаги маҳсулотларни етказиб беряпмиз. Келажакда етказиб берилаётган маҳсулотлар сонини янада кўпайтириш ниятидамиз. Умид қиламизки, маҳаллийлаштириш дастури ёрдамида ўзимиз фаолият олиб бораётган ҳудуд — Наманган вилояти Уйчи туманининг саноат соҳасидаги салоҳиятини оширишга, аҳолининг бандлигини таъминлашга муносиб ҳиссамизни қўшамиз», – деди Шуҳрат Исмоилов.
«Олмалиқ КМК» АЖ ушбу саноат ярмаркаси доирасида маҳаллий ишлаб чиқарувчилар билан олиб борилган музокаралар натижасига кўра, жами 220,3 миллиард сўмлик маҳсулот харид қилиш бўйича шартномалар, шунингдек, жами 328,4 миллиард сўмлик завод маҳсулотларини етказиб бериш бўйича дастлабки шартномаларни имзолади.
Маълумот шериклик ҳуқуқи асосида тайёрланди.
Изоҳ (0)