Xalq ta’limi vaziri lavozimiga yangi tayinlangan Baxtiyor Saidov vazirlik vakillaridan iborat ishchi guruh bilan 3 ta viloyatda bo‘lib, maktablardagi sharoitni o‘rgandi. Bu haqda uning o‘zi Telegram’dagi kanalida xabar qildi.
Uning aytishicha, maktablardagi ahvol qoniqarli emas. Ta’lim sifatini yaxshilash uchun juda ko‘p ish qilish zarur.
“Kerak bo‘lsa har bir hudud rahbaridan bugun o‘z viloyat va tumanidagi barcha maktablar sharoitini bilish talab etiladi. Joylarda fan o‘qituvchilarining bilim va saviyasini oshirishimiz kerak. Ayrim o‘qituvchilar bilan suhbatlashdim, afsuski, hatto o‘z fani bo‘yicha oddiy savolga ham javobni bilmaydigan o‘qituvchilar bor ekan”, — deya ta’kidlagan vazir.
Qayd etilishicha, hududda bir nafar yaxshi pedagog bo‘lsa ham foydalanib, uni qolgan hamkasblariga mahorat darsi o‘tkazishga jalb etgan holda, maktablarda ta’lim sifatini oshirish kerak.
“To‘g‘ri, maktabda sharoit yo‘q dersiz, lekin o‘qituvchi o‘sha yerda vaqtini ketkazib o‘tiribdi-ku, jonkuyarlik bo‘lmasa nima qiladi bu kasbni tanlab?! Uning qo‘lida inson taqdiri yotibdi! Maktablarda sharoit, infratuzilma yaxshilanishini kutsak, bolalarni yo‘qotamiz”,— degan Baxtiyor Saidov.
Avvalroq Xalq ta’limi vazirligi O‘zbekistonda 5 milliondan ortiq o‘quvchiga mo‘ljallangan maktablarda 6,2 million o‘quvchi ta’lim olayotganini ma’lum qilgandi. Sobiq xalq ta’limi vaziri Sherzod Shermatov bu masalaga to‘xtalib, 2025-yilga kelib maktablar sig‘imidagi holat juda qiyin ahvolga tushib qolishi mumkinligini bildirgan.
Prezident Shavkat Mirziyoyev 12-may kuni o‘tkazilgan yig‘ilishda maktablardagi ahvol va muammolar haqida so‘z yuritgandi. “Maktablardagi ahvolni ko‘rsa, odam, tavba deb yuboradi”, — degan davlat rahbari.
Izoh (0)