Navoiyda oltin konlari bo‘lgan 2 hudud 190 mln boshlang‘ich narx bilan auksionga qo‘yildi

Davlat geologiya qo‘mitasi oltin konlari bo‘lgan ikkita yangi maydonni onlayn auksionga qo‘ydi. Bu haqda “E-auksion”ga tayanib, Spot xabar qildi.

Ma’lum bo‘linishicha, auksionga qo‘yilgan hududlardan biri Bulutkan bo‘lib, Navoiy viloyati Uchquduq tumanida joylashgan. Oltin qazib olish litsenziyasining boshlang‘ich narxi 189,3 million so‘mni tashkil etadi.

Auksion 28-dekabr kuni bo‘lib o‘tadi, arizalar 26-dekabrga qadar qabul qilinadi. Auksion g‘oliblari 3 yil muddatga omonatdan foydalanish huquqi va tegishli litsenziyaga ega bo‘ladi.

Qayd etilishicha, ikkinchi hudud Navoiy viloyatining Tomdi tumanidagi 1451 gektar maydonda joylashgan Kinir hisoblanadi. Geologik ruxsatnomaning boshlang‘ich narxi — 223 million so‘m. Tender savdolari 23-dekabrga belgilangan, arizalar 21-dekabrga qadar qabul qilinadi.

Auksionda ishtirok etish uchun elektron auksionga ariza topshirish va uchastkaning baholangan qiymatining 5 foizi miqdorida garov to‘lash talab etiladi.

Avvalroq Toshkent viloyati Ohangaron tumanida joylashgan, umumiy maydoni 1,5 gektar bo‘lgan oltin qidirish uchun yer qa’ri uchastkasi sotuvga chiqarilgandi. Shuningdek, Davlat aktivlarini boshqarish agentligi tomonidan Navoiy viloyatida qimmatbaho metallarga ega 5 ta yer uchastkasi auksion savdolariga qo‘yilgan.