Toshkent shahrida yangi ekspress avtobus yo‘nalishi tashkil etish rejalashtirilmoqda, deb xabar qildi shahar transport boshqarmasi axborot xizmati.
Qayd etilishicha, 20,5 kilometr masofali ushbu yo‘nalish 4 ta jadval asosida 23 daqiqalik oraliq interval bilan harakatlanadi.
Avtobus Chilonzor buyum bozori avtoshohbekatidan Bunyodkor, Furqat, Sebzor, Ahmad Donish ko‘chalari orqali Toshkent halqa avtomobil yo‘lida joylashgan Uchqahramon bozori yaqinidan qayrilib olib, Yunusobod mavzesi 12-daha oxirgi bekatiga qadar yo‘lovchi oqimi gavjum katta oraliq bekatlarda to‘xtab harakatlanadi.
“Yo‘lkira narxi 3000 ming so‘m etib belgilanadi”, — deyiladi xabarda.
Eslatib o‘tamiz, avvalroq Toshkentda 7 ta yangi avtobus yo‘nalishi tashkil etilishi xabar qilingandi. Shuningdek, O‘zbekiston bo‘ylab 310 ta yangi avtobus yo‘nalishlari tashkil etilishi, Toshkentdan “Tashmore”gacha alohida yo‘lakda harakatlanuvchi tezyurar avtobuslar yo‘lga qo‘yilishi to‘g‘risida xabar berilgan.
Izoh (0)