Hukumat qarori bilan “Sun’iy intellekt texnologiyalarini qo‘llab-quvvatlash uchun maxsus rejim tashkil etish va uning faoliyatini yo‘lga qo‘yish tartibi to‘g‘risida”gi nizom tasdiqlandi. Bu haqda Telegram’dagi “Huquqiy axborot” kanali xabar qildi.
Nizomga muvofiq, maxsus rejim IT-parkning alohida bo‘g‘ini bo‘lib, u yerda huquqiy yengilliklar yaratiladi va yuridik shaxslar hamda ilmiy tashkilotlar tomonidan dasturiy mahsulotlar tajribadan o‘tkaziladi, shuningdek, amaliyotga joriy qilinadi.
Ma’lum qilinishicha, maxsus rejim ishtirokchisi bo‘lish uchun talabgorlar IT-parkning maxsus veb-platformasi orqali ariza topshiradi. Arizalar Axborot texnologiyalari va kommunikatsiyalarini rivojlantirish vazirligi tomonidan 5 ish kunida dastlabki texnik ekspertizadan o‘tkaziladi.
Qayd etilishicha, ekspert kengashi va Muvofiqlashtirish komissiyasi xulosalari asosida vazirlik talabgorlarni ishtirokchi sifatida ro‘yxatga olish yoki ro‘yxatga olishni rad etish to‘g‘risida qaror qabul qiladi. Maxsus rejim ishtirokchilari o‘z xodimlari malakasini oshirish va qayta tayyorlashga sarflangan xarajatlari davlat tomonidan kompensatsiya qilinadi.
Shuningdek, ishtirokchilarga tajriba-sinov loyihalarini amalga oshirish uchun zarur bo‘lgan ma’lumot hamda hujjatlarni, shaxsga doir egasizlashtirilgan ma’lumotlarni vazirlik, idora va tashkilotlardan olish huquqi beriladi.
Eslatib o‘tamiz, avvalroq O‘zbekistonda sun’iy intellekt asosida matnni o‘qib beruvchi birinchi o‘zbek nutq sintezatori yaratilgandi. G‘oya muallifining ma’lum qilishicha, dastur ko‘zi ojizlarga o‘zbekcha matn bilan ishlashda qulaylik yaratish maqsadida yaratilgan.
Izoh (0)