Qashqadaryo viloyatining Qarshi tumanida viloyatning birinchi tadbirkor ayoli — Nazira Shodmonova tomonidan qurib bitkazilgan masjid 14 yildan beri huvullab yotgani, qishloq ahli esa qishloqdan 10-15 kilometr uzoqlikda joylashgan shahardagi masjidlarga qatnab, namozini ado etayotgani xabar berilgandi.
“Daryo” muxbirining Qashqadaryo viloyati hokimligi mas’ul xodimi Abduvafo Tilovatovga tayanib xabar berishicha, masjid faoliyatiga ruxsat berilmayotgani haqidagi maqoladan so‘ng, viloyat hokimligi mas’ullari masjidni yana bir borib ko‘rgan.
“Masjidni borib ko‘rdik va muammo yo‘qligi haqida, faoliyat boshlanishiga to‘siq bo‘luvchi biror bir holat qolmaganini bildirib, respublikaga masjidning ochilishi haqida taklif berdik. Endi yakuniy xulosani ular aytadi”, — deydi mas’ul.
Ko‘chkakliklar esa mas’ullarning va’dasiga hamon shubha bilan qaramoqda.
“Qashqadaryoda yaqinda ikkita masjid faoliyatiga ruxsat berildi. Ammo bizning 14 yildan beri huvullab yotgan masjidimiz hamon ishlamayapti. Bu haqda murojaat qilmagan joyimiz qolmadi. Viloyatning yangi rahbari va mas’ullardan mazkur masjid taqdiriga e’tibor qaratib, masjid faoliyatiga ruxsat berilsa berilishini, ruxsat berilmaydigan bo‘lsa uniyam ro‘yi-rost aytishlarini so‘ragan bo‘lardik”, — deydi Rustam bobo Ahmedov.
“Ko‘chkak” mahallasida yashovchi Ergash Inatovning aytishicha, muammo jamoatchilikka oshkor qilingach, to‘rt kishidan iborat mas’ullar masjidga kelgan va masjidni qayta ko‘zdan kechirgan.
“Kelishdi, ko‘rishdi va masjidimiz viloyatda sharoiti bo‘yicha yagona masjid ekanini, barcha shart-sharoiti mavjudligini aytishdi. Qo‘limizdagi hujjatlarni ham birin-ketin ko‘zdan kechirishdi. Kamchilik topilmadi. Ammo ruxsat berishga kelganda esa sukut saqlanmoqda”, — deydi Ergash Inatov.
Izoh (0)