O‘zbekistonda 10 oy ichida reabilitatsiya markazlariga murojaat qilgan fuqarolar ko‘proq qanday zo‘ravonlikka uchragani ma’lum qilindi

O‘zbekistonda 2021-yilning 10 oyida Zo‘rlik ishlatishdan jabr ko‘rgan shaxslarni reabilitatsiya qilish va moslashtirish markazlariga 7226 nafar fuqaro murojaat qilgan. Bu haqda Ayollarni reabilitatsiya qilish va moslashtirish respublika markazi direktori Muqaddam Rasulova AOKAda o‘tkazilgan brifingda ma’lum qildi.

Brifingda ma’lum qilinishicha, 2021-yilning 10 oyida Zo‘rlik ishlatishdan jabr ko‘rgan shaxslarni reabilitatsiya qilish va moslashtirish markazlariga 7226 nafar fuqaro murojaat qilgan, ulardan — 4518 ta holatda turli zo‘ravonlik sodir etilgan.

Shundan:

• 2457 ta — ruhiy;
• 1358 ta — jismoniy;
• 37 ta — jinsiy;
• 666 ta — iqtisodiy zo‘ravonlik;
• 2708 ta holatda oilaviy nizolar, kelishmovchiliklar, ajrashish masalalari bilan murojaatlar qayd etilgan.

Ta’kidlanishicha, tazyiq va zo‘ravonlikdan jabr ko‘rgan, o‘z joniga suiqasd qilgan yoki o‘z joniga qasd qilishga moyilligi bo‘lgan xotin-qizlar bilan o‘zaro muloqot qilish va shoshilinch ruhiy, psixoterapevtik, huquqiy yordam ko‘rsatish, maslahat berish va axborot taqdim etish uchun 1146 ishonch telefoni 24 soat uzluksiz ishlamoqda.

Avvalroq O‘zbekistonda gender zo‘ravonlikka qarshi 16 kunlik faol harakatlar kampaniyasi e’lon qilingani, Xalq ta’limi vazirligiga o‘z joniga qasd qilishga moyil qizlar ro‘yxatini shakllantirish vazifasi yuklangani to‘g‘risida xabar berilgandi.

Eslatib o‘tamiz, prezidentning 2021-yil 19-maydagi qarori bilan Ayollarni reabilitatsiya qilish va moslashtirish markazlari tashkil etilgan. Ular bungacha Zo‘rlik ishlatishdan jabr ko‘rgan shaxslarni reabilitatsiya qilish va moslashtirish hamda o‘z joniga qasd qilishning oldini olish markazlari deb nomlangan tuzilmalar negizida tashkil etilgan.