“Bunyodkor” futbol klubi o‘z xodimlariga oktabr oyi uchun 1,5 milliard so‘mdan ko‘proq miqdordagi maoshlarni to‘lab berishni kechiktirgani haqida “Effect.uz” ma’lum qildi. Ushbu holat Toshkent shahar Davlat mehnat inspeksiyasi tomonidan o‘tkazilgan o‘rganishda aniqlangan.
Ijtimoiy tarmoqlarda “Bunyodkor” futbol klubi tomonidan xodimlarga ikki oylik ish haqlari to‘lab berilmayotgani to‘g‘risida xabarlar tarqaldi.
Inspeksiya tomonidan o‘rganish davomida, ayni vaqtda klub tomonidan jami 393 nafar xodimga nisbatan oktabr oyi uchun 1 milliard 532 million 216 ming so‘m miqdoridagi oylik maoshlari to‘lab berilishi kechiktirilgani aniqlangan. Shuningdek, hozirda klub homiysi “O‘zbekneftgaz” AJ tomonidan mablag‘lar ajratilayotgani va xodimlarga ushbu to‘lovlarni to‘lab berish harakatlari amalga oshiralayotganini ma’lum qilingan.
Bundan tashqari, “Bunyodkor” futbol klubi bosh direktori Ulug‘bek Mirzayev nomiga xodimlarga oylik ish haqi bo‘yicha yuzaga kelgan qarzdorlikni bartaraf qilish hamda keyinchalik oylik ish haqlarini o‘z muddatida to‘lash bo‘yicha Davlat mehnat isnpeksiyasi tomonidan yozma ko‘rsatma kiritilgan.
Eslatib o‘tamiz, 2021-yilning fevral oxirlarida “Bunyodkor” stadioni Toshkent hokimi Jahongir Ortiqxo‘jayev otalig‘iga o‘tishi to‘g‘risida xabar berilgandi.
Izoh (0)