APLda “Chelsi” — “Manchester Yunayted” to‘qnashuvi, La Ligada “Real” “Sevilya”ni qabul qiladi, A Seriyada Shomurodov jamoasi Turin klubiga qarshi. Uikendning markaziy o‘yinlari

APL. “Chelsi” “Manchester Yunayted”ga qarshi, Pep Gvardiola shogirdlari “Vest Hem”ni sinovdan o‘tkazadi, “Nyukasl” Londonda “Arsenal” mehmoni bo‘ladi

“Chelsi” — “Manchester Yunayted”, 28-noyabr, 21:30

Tomas Tuxel shogirdlari musobaqa yetakchisi bo‘lib turibdi. Asosiy raqobatchilarga qarshi o‘yinlarda ochko yo‘qotgan bo‘lsa-da, londonliklar jadvalda birinchi o‘rinda bormoqda. Birinchi davrada “Manchester Siti”ga mag‘lub bo‘ldi, “Liverpul” bilan 1:1 hisobida durang natija qayd etdi. “Chelsi”ning asosiy ustunligi kuchsizroq jamoalardan muntazam ochko olib kelayotganida. Uydagi o‘yinlarda “Chelsi” APLdagi eng yaxshi natijani qayd etib turibdi. 6 ta o‘yinning 4 tasida g‘alaba qozongan “aristokratlar” 13 ochko jamg‘ara oldi. To‘plar nisbati esa 17:3.

Jamoada jarohatlangan futbolchilar deyarli yo‘q. Mateo Kovachichning maydonga tushmasligi aniq. Timo Vernerning o‘ynashi esa so‘roq ostida. Londonliklar safida hujum chizig‘ining faol vakili himoyachi Ris Jeyms bo‘lib turibdi. Ingliz futbolchisi 4 ta gol va 3 ta golli uzatmani o‘z hisobiga yozdirib qo‘ygan. Romelu Lukaku va Meyson Maunt hisobida 3 tadan gol mavjud.

“Manchester Yunayted” inqiroz davrini boshdan kechiryapti. “Qizil iblislar” APLning 10-turida “Tottenhem” ustidan g‘alaba qozondi. Bu g‘alaba oxirgi 6 o‘yindagi yagonasi bo‘lib qoldi. Undan so‘ng mankunianliklar “Manchester Siti”, “Liverpul”, “Lester” va “Aston Villa”ga mag‘lub bo‘ldi. “Everton” bilan 1:1 hisobida durang natija qayd etdi. Omadsiz o‘yinlar sabab “Manchester Yunayted” kuchli to‘rtlikdan chiqib ketgan.

Manchesterliklarning lazaretida ikki nafar fransuz futbolchisi bor. Rafael Varan dekabrga qadar jamoaga yordam berolmaydi, yarim himoyachi Pol Pogba uchun esa yil yakunlangan.

Qolgan uchrashuvlar: 

La Liga. Xavining oldida jiddiy sinov: “Barselona” “Vilyarreal”ga qarshi, turning markaziy uchrashuvida “Real” “Sevilya” bilan bahs olib boradi

“Real” — “Sevilya”, 28-noyabr, 01:00

Qirollik klubi ushbu uchrashuvga 5 o‘yinlik g‘alabali seriya bilan tashrif buyuradi. Umumiy hisobda “Real” 8 o‘yindan buyon mag‘lub bo‘lmayapti (7 ta g‘alaba, bitta mag‘lubiyat). Karlo Anchelotti jamoasi musobaqaning yetakchisi bo‘lib turibdi, Chempionlar Ligasida esa muddatidan avval pley-off yo‘llanmasini qo‘lga kiritdi.

“Sevilya” 28 ochko bilan 3-o‘rinni egallab turibdi. Oxirgi turda Xulen Lapotegi shogirdlari “Alaves” bilan 1:1 hisobida durang qayd etdi. Chempionlar Ligasida esa “Volfsburg”ni 2:o hisobida taslim etdi va pley-off yo‘llanmasini qo‘lga kiritish uchun imkoniyatni saqlab qoldi.

Qolgan uchrashuvlar:

A Seriya. “Napoli” “Latsio” bilan hisob-kitob qiladi, Shomurodov jamoasi “Torino”ni sinovdan o‘tkazadi, “Yuventus” esa “Atalanta”ga qarshi

“Roma” — “Torino”, 28-noyabr, 22:00

Joze Mourinyo shogirdlari Genuyada “Jenoa” ustidan 2:0 hisobida g‘alaba qozondi. 13 turdan so‘ng “Roma” 22 ochko bilan 5-o‘rindan joy olgan. Jamoaning eng yaxshi to‘purari — Lorenso Pellegrini bo‘lib turibdi. Futbolchi barcha musobaqalarda 21 ta o‘yinda maydonga tushib, 8 ta gol urgan. Oxirgi 4 turdan buyon rimliklar birorta o‘yinni golsiz tark etmayapti.

Oxirgi turda “Torino” “Udineze”ni 2:1 hisobida taslim etdi. Turinliklar 17 ochko bilan 11-o‘rinda bormoqda. Yosip Brekalo jamoaning eng yaxshi to‘purari hisoblanadi. U 8 o‘yinda 3 ta golga mualliflik qildi. So‘nggi 5 o‘yinda “Torino” 8 ta gol urishga muvaffaq bo‘lgan.

Qolgan uchrashuvlar: 

Bundesliga. Markaziy o‘yinda “Volfsburg” “Borussiya D”ga qarshi, “Bavariya” “Arminiya”ni qabul qiladi

“Volfsburg” — “Borussiya D”, 27-noyabr, 19:30

“Volfsburg” Bundesligada oltinchi o‘rinni egallab turibdi. “Bo‘rilar” hisobida 20 ochko mavjud. “Volfsburg”ning mag‘lubiyatsiz seriyasi 3 taga yetdi. “Bayer” va “Augsburg”ga qarshi o‘yindagi g‘alaba va “Arminiya” bilan mehmondagi durang. Jamoa o‘z uyidagi o‘yinlarning oxirgi 4 tasidan faqat bittasida g‘olib bo‘lgan.

“Borussiya D” bu paytda “Bavariya”ni quvishda davom etmoqda. Dortmundliklar musobaqa yetakchisidan bir ochko kam jamg‘argan holda ikkinchi o‘rinda bormoqda.

Bundesligada “Borussiya” oxirgi 6 turda 5 ta g‘alaba qozondi. Faqatgina “Leypsig”ga qarshi o‘yinda mag‘lub bo‘ldi.

Germaniya chempionatining mehmondagi 5 o‘yinida Marko Rouz shogirdlari 3 marta imkoniyatni boy bergan.

Qolgan uchrashuvlar: 

Liga 1. “PSJ” musobaqa autsayderiga qarshi, “Lion” “Monpelye” bilan bahs olib boradi

“Sent-Etyen” — “PSJ”, 28-noyabr, 17:00

Fransiya chempionatining ortda qolgan 14 turidan so‘ng “Sent-Etyen” 12 ochko bilan 19-o‘rindan joy olgan. Jamoaning eng yaxshi to‘purari — Vahbi Hazri bo‘lib, futbolchi 14 o‘yinda 7 ta gol urgan. “Sent-Etyen” Liga 1 ning oxirgi 4 o‘yinida mag‘lubiyat nimaligini bilmayapti.

Parijliklar esa oxirgi turda “Nant”ni 3:1 hisobida taslim etdi. Maurisio Pochettino shogirdlari hisobida 37 ochko mavjud va ular musobaqa yetakchisi hisoblanadi. Kilian Mbappe — jamoaning to‘purari, u 18 o‘yinda 9 ta golni o‘z nomiga yozdirib qo‘ygan. Undan tashqari, Lionel Messi ham Fransiya chempionatidagi debyut golini urib oldi, endilikda uning golga bo‘lgan chanqog‘i yanada oshishi tabiiy.

Qolgan uchrashuvlar: