Хориж разведка хизматлари Хитой миллий хавфсизлигига жиддий таҳдид солмоқда. Бу ҳақда мамлакат Мудофаа вазирлиги расмий вакили У Сянга таяниб, «Коммерсантъ» хабар берди.
У Сян ОАВларда Хитой ҳукумати мамлакат ҳудудида нотижорат ташкилот ниқоби остида фаолият кўрсатиб, хориждан молиялаштирилган разведка тармоғини аниқлагани тўғрисида тарқалган хабарларга изоҳ берган.
Матбуот анжумани давомида Хитой Мудофаа вазирлиги вакили хориж махсус хизматларининг хатти-ҳаракати, хусусан, Хитой ҳарбий тузилмалари учун таҳдид туғдираётганини маълум қилган. Унинг сўзларига кўра, сўнгги пайтларда хориж разведкалари ва «душман кучлари» «махфий маълумотларни ўғирлаш ва сиздириш бўйича» ҳаракатини фаоллаштирган. «Миллий хавфсизликка путур етказадиган ва ҳарбий сирларни ошкор қиладиган ҳар қандай ҳаракат қонун билан қаттиқ жазоланиши керак», — дейди у.
Хитойнинг Global Times газетасининг ёзишича, нотижорий ташкилот ниқоби остида фаолият юритганликда гумонланган разведка тармоғи денгиз чиқиндиларини кузатиш бўйича лойиҳани амалга ошириб келган. Шу орқали ташкилот Жанубий Хитой, Шарқий Хитой ва Сариқ денгиз, шунингдек, Бохай кўрфазида 100 та пунктдан иборат мониторинг тармоғини яратган. Уларнинг 22 таси Хитой ҳарбий объектлари яқинида жойлашган, бу эса «Хитой ҳарбий хавфсизлигига тўғридан-тўғри таҳдид ҳисобланади». Ташкилот «махфий маълумотларни тўплаш» ва уларни хорижга узатиш билан шуғуллангани айтилмоқда. Мазкур ташкилот номи ошкор этилмаган, аммо у «дунё океани масалалари» билан шуғуллангани ва сўнгги йилларда хориждан молиялаштирилгани маълум. Уни қайси давлатлар молиялаштиргани номаълум.
Аввалроқ Пентагон Хитой 2027 йилга қадар қуролланишга 700 та ядро каллагини етказиб беришни, 2030 йилга бориб эса уларнинг сонини мингга етказишни режалаштираётгани, АҚШ бетон объектларни йўқ қиладиган янги авиабомбани синовдан муваффақиятли ўтказгани тўғрисида хабар берилганди.
Изоҳ (0)