Ўзбекистон шифохоналарида ЎРВИга чалинган болалар учун қўшимча 5 мингдан ортиқ ўрин-жой ташкил қилинди, деб хабар бермоқда Соғлиқни сақлаш вазирлиги.
Маълум бўлишича, октябрь ойидан бошлаб мамлакатда болалар ўртасида ўткир респиратор вирусли инфекцияларнинг даврий кўтарилиши кузатилаётгани сабабли тиббиёт муассасаларига мурожаатлар ва Тез ёрдам хизматига чақириқлар сони сезиларли даражада ортган. ССВ ушбу касалликка чалинган бемор болаларга ўз вақтида сифатли тиббий хизмат кўрсатиш, шифохоналарда қўшимча ўрин-жойлар ташкил этиш, бу орқали тиббиёт муассасаларига тушаётган юкламаларни камайтириш бўйича ишлар олиб борган.
Жумладан, ўрганишлар натижасида Тошкент шаҳар шифохоналарида қўшимча 884 та, мамлакат бўйича 5 062 та стационар ўрин-жой ташкил этилиб, 25 ноябрь ҳолатига кўра, пойтахт шифохоналаридаги жами ўрин-жойлар 3 521 та, Ўзбекистон бўйича эса қарийб 19 800 тага етказилган. Айни пайтда Тошкент шаҳар тиббиёт муассасаларида бўш ўринлар сони 661 та, республика бўйича 4 700 тани ташкил қилмоқда.
Аввалроқ Соғлиқни сақлаш вазирлиги Тошкент шаҳрида болалар ўртасида мавсумга хос бўлган ўткир респиратор вирусли инфекцияларга чалиниш ҳолатлари кўп кузатилаётганини, 1—18 ноябрь кунлари тез ёрдамга болалар бўйича 20 мингдан зиёд чақириқ келиб тушганини хабар қилганди.
Бу орқали пойтахтдаги болалар клиник шифохоналарига юкламалар сезиларли даражада ортгани сабабли соғлиқни сақлаш вазири Баҳодир Мусаев бошчилигида ишчи гуруҳ тузилиб, 13 ноябрь тунда пойтахт шифохоналаридаги вазият ўрганилган эди.
Эслатиб ўтамиз, Тошкентда ёш болалар орасида грипп билан касалланиш ҳолати кескин кўпайгани, болаларнинг гриппга чалиниш ҳолати билан Тошкент педиатрия тиббиёт клиникасига ҳар куни 400 га яқин мурожаат келаётгани хабар қилинган.
Изоҳ (0)