Axborot texnologiyalari va kommunikatsiyalarini rivojlantirish vaziri Sherzod Shermatov “O‘zbekiston telekommunikatsiya tarmoqlarini boshqarish Respublika markazi” davlat unitar korxonasi faoliyati bilan tanishdi, deb xabar beradi vazirlik matbuot xizmati.
Ma’lum qilinishicha, Sherzod Shermatov markaz faoliyati va xodimlar uchun yaratilgan shart-sharoitlar bilan tanishib, markaz mutaxassislari tomonidan amalga oshirilgan ishlar bilan tanishga, shuningdek, unga yaqin kelajakda ishga tushurilishi rejalashtirilgan loyihalar bo‘yicha taqdimot o‘tkazilgan. Ularning har biri bo‘yicha alohida muhokama qilinib, mavjud muammolar yechimi ko‘rib chiqilgan.
Yaqin kelajakda amalga oshirilayotgan loyihalar qatorida mobil telefon raqamlarini ko‘chirish tizimi loyihasi ham bor.
“IMEI kodlarini ro‘yxatdan o‘tkazish jarayonini iste’molchilar uchun yanada osonlashtirish yo‘llarini topishimiz va unga ko‘ra, fuqarolar xizmatlardan oson va qulay foydalanish imkoniyatiga ega bo‘lishi kerak. Buning uchun barcha choralarni ko‘rish zarur”, — deydi AKT vaziri.
Taqdimotda soha rahbarlari o‘z taklif va mulohazalarini bildirib, bu boradagi mavjud muammolarni birgalikda o‘rganish va hal etish uchun zarurligini ham ta’kidlagan.
Ma’lumot uchun, 3-noyabr kuni ijtimoiy tarmoqlar bloklanishi ortidan prezident farmoni asosida axborot texnologiyalari va kommunikatsiyalarini rivojlantirish vaziri Shuhrat Sodiqov lavozimidan ozod etilgandi. 18-noyabr kuni esa Sherzod Shermatov axborot texnologiyalari va kommunikatsiyalarini rivojlantirish vaziri lavozimiga tayinlandi.
Eslatib o‘tamiz, O‘zbekistondagi mobil telefonlar maxsus IMEI kodi bo‘yicha ro‘yxatga olinishi tartibi 2019-yil 1-apreldan joriy etilgan. 2020-yil 22-sentabr kuni mobil qurilmalarning IMEI kodlarini ro‘yxatdan o‘tkazish tizimi ma’muriyati tomonidan mobil qurilmalarni UzIMEI tizimida ro‘yxatdan o‘tkazish jarayoniga o‘zgartirish kiritilgan, unga ko‘ra, qurilmaning IMEI kodini/kodlarini ro‘yxatdan o‘tkazishda jismoniy shaxslar tomonidan foydalaniladigan abonent raqami mahalliy mobil operatorlaridan ariza beruvchi nomiga rasmiylashtirilgan bo‘lishi kerakligi belgilangandi. Qator OAV va blogerlar mazkur o‘zgarish qonunga zid ravishda amalga oshirilgan bo‘lishi mumkinligini bildirgan.
Izoh (0)