O‘zbekistonda endilikda sug‘urta shartnomasi internet orqali elektron shaklda tuzilishi mumkin, deb xabar berdi Yagona interaktiv davlat xizmatlari portali.
Ma’lum qilinishicha, Shavkat Mirziyoyev “Sug‘urta faoliyati to‘g‘risida”gi qonunni imzolagan. Qonunda sug‘urta tavakkalchiligi, sug‘urta tarifi, franshiza, transchegaraviy sug‘urta va boshqa shu kabi asosiy tushunchalarga ta’riflar berilgan.
Qonunga ko‘ra, sug‘urta bozorining professional ishtirokchilari (sug‘urtalovchilar, sug‘urta vositachilari, adjasterlar, aktuariylar, sug‘urta syuveyerlari, assistans)ning huquq va majburiyatlari aniq belgilab qo‘yilgan. Qonun bilan sug‘urta qildiruvchi va sug‘urtalovchi o‘rtasida elektron shakldagi axborot almashinuvining o‘ziga xos xususiyatlari belgilangan.
Qayd etilishicha, endilikda sug‘urta shartnomasini internet orqali elektron shaklda tuzish mumkin. Qonun rasmiy e’lon qilingan kundan e’tiboran uch oy o‘tgach kuchga kiradi.
Eslatib o‘tamiz, O‘zbekistonda majburiy tibbiy sug‘urta tizimi 2021-yildan tashkil etilishi ma‘lum qilingandi. Bundan tashqari, O‘zbekistonda 2021-yil 1-martdan boshlab avtomobil egalarini elektron sug‘urta qilish amaliyoti joriy etilishi xabar qilingan.
2021-yilning oktabr oyida esa “Sug‘urta bozorini raqamlashtirish va hayot sug‘urtasi sohasini rivojlantirish bo‘yicha qo‘shimcha chora-tadbirlar to‘g‘risida”gi prezident qarori qabul qilingan. Unga ko‘ra, O‘zbekistonda 2022-yil 1-iyuldan sug‘urtaning barcha turlari elektron shaklda amalga oshiriladi.
Izoh (0)