Dunyo va o‘zbek sportiga oid 24-noyabr tongining eng muhim xabarlari dayjesti bilan tanishing.
O‘zbekiston
Server Jeparov qo‘l ostidagi O‘zbekiston U-15 terma jamoasi CAFA musobaqasida Tojikistonga ham yutqazdi
O‘zbekiston U-15 terma jamoasi 3-turda mezbonlarga qarshi bahs olib bordi. 57-daqiqada kiritilgan yagona gol Tojikistonga g‘alaba keltirdi.
Shu tariqa Jeparov shogirdlari uchinchi o‘yinda ham g‘alaba qozona olmadi. Avvalroq jamoa Eronga yutqazgan (2:3) va Qirg‘iziston bilan durang (2:2) o‘ynagandi.
JCh—2021 sovrindori Abdumalik Halokov pul mukofoti bilan taqdirlandi
Serbiyada o‘tgan boks bo‘yicha Jahon chempionatida kumush medaliga ega chiqqan bokschi 22-noyabr kuni Buxoro viloyati hokimligi tomonidan taqdirlandi. Xabarlarga ko‘ra, hokimlik tomonidan bokschiga 50 million so‘m mukofot puli berilgan. Shuningdek, uning murabbiyi Davron G‘ofurovga ham pul mukofoti topshirilgan.
Toshkent—2025. Yoshlar o‘rtasidagi Osiyo o‘yinlari uchun tayyorlangan videorolik namoyish etildi
BAAning Dubay shahrida bo‘lib o‘tgan Osiyo Olimpiya kengashining bosh assambleyasida “Toshkent-2025” IV yoshlar Osiyo o‘yinlariga tayyorgarlik jarayoni aks etgan videorolik namoyish etildi.
“So‘g‘diyona-W” — O‘zbekiston Kubogi sohibi
Toshkentdagi “Bunyodkor” stadionida ayollar futbolchi bo‘yicha O‘zbekiston Kubogi finali bo‘lib o‘tadi. Unda “Bunyodkor-W” va “So‘g‘diyona-W” jamoalari o‘zaro bahs olib bordi. Uchrashuv taqdirini yagona gol hal qildi va jizzaxliklar mamlakat kubogiga ega chiqdi.
Avvalroq “So‘g‘diyona-W” O‘zbekiston ayollar chempionatining 2021-yilgi mavsum g‘olibiga aylangandi.
Jahon
“Al-Hilol” — 4 karra OChL g‘olibi
Saudiya Arabistonining “Al-Hilol” klubi Osiyo Chempionlar Ligasi finalida Janubiy Koreyaning “Pohang Stilers”ni mag‘lubiyatga uchratib (2:0), o‘z tarixida to‘rtinchi marta musobaqaga g‘olibiga aylandi.
Yana ikkita APL klubi YChL pley-offiga yo‘l oldi
Chempionlar Ligasining 5-turidan o‘rin olgan ayrim o‘yinlar 23-noyabr kuni o‘tkazildi. Seshanba oqshomidagi bahslardan keyin “Chelsi” va “Manchester Yunayted” jamoalari pley-off masalasini hal qildi. Avvalroq “Liverpul” o‘z guruhida birinchi o‘rinni naqd qilgandi.
24-noyabr oqshomida A—D guruhlaridagi uchrashuvlar o‘tkaziladi. Bir nechta jamoa ushbu turdan keyin keyingi bosqich masalasini ijobiy hal qilishi mumkin.
Serxio Ramos “PSJ” safida debyut qilishi mumkin
Parijliklar himoyachisi YChL doirasida “Manchester Siti”ga qarshi kechadigan o‘yin qaydnomasidan joy oldi.
35 yoshli futbolchi jarohatlar tufayli mavsum avvalini o‘tkazib yuborgandi.
Ramos 2021-yilning may oyidan beri birorta o‘yinda maydonga tushmadi. U yozda erkin agent maqomida “Real”dan “PSJ”ga yo‘l olgandi.
“Manchester Yunayted”ga rad javobini bergan Zidan “PSJ”ga yo‘l olishi mumkin, Pochettino esa Manchesterga
“Real” sobiq ustozi Zinedin Zidan “PSJ” boshqaruvini o‘z qo‘liga olishi mumkin. Marca xabariga ko‘ra, parijliklar klubi futbolchilari Zidanning jamoaga kelishiga ishonmoqda. Uning nomi kiyinish xonasida bir necha bor tilga olingan va futbolchi ushbu kelishuv amalga oshishi mumkinligiga ishonmoqda.
O‘z navbatida Maurisio Pochettino xizmatlariga “Manchester Yunayted”dan qiziqish bor. Argentinalik mutaxassis “qizil iblislar” boshqaruvini qo‘liga olishga tayyor, deya xabar qilmoqda Manchester Evening News.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)