Qashqadaryo viloyatining Qarshi shahrida joylashgan tibbiyot maskani qurilishi 2018-yil boshlangan bo‘lib, hamon chala qolib kelayotgani ma’lum bo‘ldi. Bu haqda viloyat hokimi matbuot kotibi Ahror Sodiqov ma’lum qildi.
Uning yozishicha, 23-noyabr kuni shaharning bir qator ijtimoiy obyektlarini ko‘zdan kechirgan viloyat hokimi Murodjon Azimov kechki payt Respublika shoshilinch tibbiy yordam ilmiy markazi Qarshi filialiga ham borgan. Hokim shifokorlar, bemorlar va ularning yaqinlari uchun yaratilgan shart-sharoitlarni o‘rgangan. Fuqarolarning o‘zlari bilan suhbatlashib, sharoit haqida ma’lumot olgan.
“Bugungi kunda prezidentimiz tomonidan tibbiyot sohasiga qaratilayotgan e’tibor natijasida ko‘plab samarali ishlar amalga oshirilayotgani, hududda karantin qoidalariga amal qilish, prezidentimizning xalqni rozi qilish tamoyili asosida ishni tashkil qilish kerakligi ta’kidlandi”, — deydi Ahror Sodiqov shaxsiy Telegram-kanalida.
Murodjon Azimov endi ko‘p joylarga xabar bermasdan borishini, ana shundagina asl holatdan xabar topishi mumkinligini aytib, “Bugungi xalqni aldab bo‘lmaydi. Xalq vakili sifatida har bir rahbar bu narsani tushunishi kerak”, — degan.
“Viloyat hokimi markaz mas’ullari bilan suhbatlashganda hududning qurilish ishlari 2018-yil boshlangani, ammo to‘rt yil ichida ham oxiriga yetmaganini ta’kidlashdi. Viloyat hokimi zudlik bilan shtab tashkil qilib, ertadan tezkor ish boshlanishini nazoratga olishini bildirdi”, — deydi viloyat hokimi matbuot kotibi.
“Daryo” muxbiri bilan suhbatlashgan Respublika shoshilinch tibbiy yordam ilmiy markazi Qarshi filiali direktori Doniyor Tursunov qurilish ishlari to‘xtab qolishiga mablag‘ yetishmasligi sabab bo‘lganini aytdi.
Doniyor Tursunovning ma’lumot berishicha, filial ta’miri va qo‘shimcha bino uchun dastlab 16,5 milliard so‘m ajratilgan bo‘lib, dastlabki bosqichda ko‘zda tutilgan ishlar bajarilgan. Keyingi bosqich uchun ajratilishi lozim bo‘lgan 9 milliard so‘m mablag‘ o‘z vaqtida berilmagani bois qurilish-ta’mirlash ishlari to‘xtab qolgan.
“Mazkur maskanga mas’ul etib tayinlanganimdan so‘ng qurilish va ta’mirlash ishlariga ajratilishi lozim bo‘lgan mablag‘ ortidan quvib, mablag‘ni oldik va qurilish ishlari davom ettirilmoqda”, — deydi Doniyor Tursunov.
Izoh (0)