Қашқадарё вилоятининг Қарши шаҳрида жойлашган тиббиёт маскани қурилиши 2018 йил бошланган бўлиб, ҳамон чала қолиб келаётгани маълум бўлди. Бу ҳақда вилоят ҳокими матбуот котиби Аҳрор Содиқов маълум қилди.
Унинг ёзишича, 23 ноябрь куни шаҳарнинг бир қатор ижтимоий объектларини кўздан кечирган вилоят ҳокими Муроджон Азимов кечки пайт Республика шошилинч тиббий ёрдам илмий маркази Қарши филиалига ҳам борган. Ҳоким шифокорлар, беморлар ва уларнинг яқинлари учун яратилган шарт-шароитларни ўрганган. Фуқароларнинг ўзлари билан суҳбатлашиб, шароит ҳақида маълумот олган.
«Бугунги кунда президентимиз томонидан тиббиёт соҳасига қаратилаётган эътибор натижасида кўплаб самарали ишлар амалга оширилаётгани, ҳудудда карантин қоидаларига амал қилиш, президентимизнинг халқни рози қилиш тамойили асосида ишни ташкил қилиш кераклиги таъкидланди», — дейди Аҳрор Содиқов шахсий Telegram-каналида.
Муроджон Азимов энди кўп жойларга хабар бермасдан боришини, ана шундагина асл ҳолатдан хабар топиши мумкинлигини айтиб, «Бугунги халқни алдаб бўлмайди. Халқ вакили сифатида ҳар бир раҳбар бу нарсани тушуниши керак», — деган.
«Вилоят ҳокими марказ масъуллари билан суҳбатлашганда ҳудуднинг қурилиш ишлари 2018 йил бошлангани, аммо тўрт йил ичида ҳам охирига етмаганини таъкидлашди. Вилоят ҳокими зудлик билан штаб ташкил қилиб, эртадан тезкор иш бошланишини назоратга олишини билдирди», — дейди вилоят ҳокими матбуот котиби.
«Дарё» мухбири билан суҳбатлашган Республика шошилинч тиббий ёрдам илмий маркази Қарши филиали директори Дониёр Турсунов қурилиш ишлари тўхтаб қолишига маблағ етишмаслиги сабаб бўлганини айтди.
Дониёр Турсуновнинг маълумот беришича, филиал таъмири ва қўшимча бино учун дастлаб 16,5 миллиард сўм ажратилган бўлиб, дастлабки босқичда кўзда тутилган ишлар бажарилган. Кейинги босқич учун ажратилиши лозим бўлган 9 миллиард сўм маблағ ўз вақтида берилмагани боис қурилиш-таъмирлаш ишлари тўхтаб қолган.
«Мазкур масканга масъул этиб тайинланганимдан сўнг қурилиш ва таъмирлаш ишларига ажратилиши лозим бўлган маблағ ортидан қувиб, маблағни олдик ва қурилиш ишлари давом эттирилмоқда», — дейди Дониёр Турсунов.
Изоҳ (0)