Bandlik va mehnat munosabatlari vazirligi ijtimoiy tarmoqlarda Navoiyda maktab direktori emlanmagan o‘qituvchilarni ishdan bo‘shatgani to‘g‘risida tarqalgan xabarlarga munosabat bildirdi.
Ijtimoiy tarmoqlarda maktabi direktori COVID-19 ga qarshi vaksina olmagan 20 nafar o‘qituvchini ishdan bo‘shatgani haqida xabar tarqaldi. Holat yuzasidan Navoiy viloyati Bandlik bosh boshqarmasi Davlat mehnat inspeksiyasi o‘rganish o‘tkazgan.
O‘rganish jarayonida maqolada ko‘rsatilgan holatlar o‘z tasdig‘ini topgan. Unga ko‘ra, Navoiy viloyati Qiziltepa tuman xalq ta’limiga qarashli 12-umumiy o‘rta ta’lim maktabi direktori va o‘qituvchilaridan tushuntirish xatlari olingan.
Yuqoridagilarga asosan Davlat mehnat inspeksiyasi tomonidan 23-noyabrda maktab direktori nomiga 18/00-01/11-571-sonli yozma ko‘rsatma kiritilib, buyruqlar bekor qilingan. Shuningdek, qonunbuzilish holatlariga yo‘l qo‘ygani sababli maktab direktoriga nisbatan Ma’muriy javobgarlik to‘g‘risidagi kodeksining 49-moddasi (mehnat va mehnatni muhofaza qilish to‘g‘risidagi qonunchilikni buzish) 1-qismiga asosan ma’muriy jarima qo‘llangan.
Ma’lumot uchun, mazkur modda bilan ayblangan mansabdor shaxslarga BHMning 5 baravaridan 10 baravarigacha (2,75 million so‘mgacha) miqdorda jarima solishga sabab bo‘ladi.
Avvalroq O‘zbekistonda vaksina olmagan 26 ming xodim ishdan vaqtinchalik chetlatilgani to‘g‘risida xabar berilgandi.
Izoh (0)