“Og‘riqli nuqta”. Buxorodagi “ahvoli qo‘rqinchli”, bemorni battar kasal qiladigan tibbiyot muassasasi haqida

Buxoroning Vobkent tumanidagi “Paxtakor” oilaviy shifokor punkti “Qo‘qin”, “Rohkent” va “Guliston” mahallalarida joylashgan yetti qishloqning salkam 9 ming aholisiga xizmat ko‘rsatadi. “Daryo”ga murojaat qilgan aholi so‘zlariga ko‘ra, shifoxonaning “ahvoli qo‘rqinchli” — zax, sovuq, devorlari nuragan, ta’mirtalab. “Daryo” muxbiri murojaatni o‘rganish uchun mazkur shifokor punktida bo‘ldi.

“Bu qo‘rqinchli shifoxona bemorni battar kasal qiladi”

Murojaatda, jumladan, shunday deyilgandi: “Tibbiyot muassasasi uyimizdan ancha uzoq bo‘lgani bois muolajalarni to‘liq olish uchun kun bo‘yi shu yerda qolib ketamiz. Ammo zax va sovuq xonalar salomatligini tiklash maqsadida kelgan bemorlarga aksta’sir ko‘rsatadi”. Darhaqiqat, 1979-yili kolxoz mehmonxonasi sifatida salobatli qilib qurilgan, 2007-yilda tibbiyotga moslashtirilgan bino xonalari sovuq — tashqarida havo harorati pasayganiga qaramay, isitish tizimi ishga tushirilmagan, binoning har chekkasidan nam va zax hidi anqiydi; devorlarning suvoqlari ko‘chib, to‘kila boshlagan.

“Yoriq va yamalgan pollar namlikni yanada ko‘p tortmoqda. Shu ahvolda ishlashga majburmiz”, — deydi peshtoqiga “Hamshiralar xonasi” deb yozilgan, lekin ichi punktning boshqa xonalari kabi sovuq xonada o‘tirgan 10 dan ortiq hamshiraning biri. Ko‘rib turganimiz so‘nggi bir-ikki yilda yuzaga kelgan holat emas — ushbu shifokor punktida 8-9 yildan beri ishlayotgan hamshiralarning ta’kidlashicha, “yillar davomida ahvol o‘zgarmagan”. “Biz oddiy hamshira bo‘lsak, nachora, ko‘nib ishlashga majburmiz-da”, — deya birinchi hamshiraning fikrini tasdiqlaydi boshqasi.

Bunday zax, nam va sovuq xonalar nafaqat bemorlarning ahvolini og‘irlashtirishi, balki tibbiyot xodimlarining o‘zini ham kasal qilishi mumkin. “Gohida bir kunda uch marta muolaja olishi lozim bo‘lgan bemorlar bilan kechki soat 21:00 gacha qolib, ishlashimizga to‘g‘ri keladi. Bunday paytda o‘z sog‘ligimiz uchun ham qayg‘uramiz”, — deydi hamshiralardan biri. Shifoxonadagi holat birinchi galda xodimlar uchun noqulayligini bosh shifokor Nafisa Hamroyeva ham tasdiqlaydi: “To‘g‘ri, noqulay. Men asli tuman tug‘ruqxonasida ishlardim, bu yerga esa uyimga yaqinligi uchun kelganman”. Ilojsizlik.

Shifoxona bir necha bor, jumladan, xodimlar puliga ta’mirlangan

Hamshiralarning so‘zlariga ko‘ra, tuman mutasaddilari har yili ikki-uch marta kelib, ahvolni o‘rganadi, shifokor punktining ayanchli holatini suratlarga tushiradi va bino ta’mirlanishi bo‘yicha va’dalarni berib ketadi. Kamiga bosh shifokor Nafisa Hamroyeva mas’ul tashkilotlarga 10 yildan beri murojaat qilib keladi, “lekin natija yo‘q”.

Shu yerda ishlaydigan hamshiralar bu joyni “ikkinchi uyimiz” deydi — mutasaddilarning va’adasiga ishonib o‘tiraversang, “uy” oxiri to‘kilib tushishi mumkin, shu bois xodimlar jamoasi bir necha bor oylik maoshdan pul yig‘ib (“shu pulni masjidga ham tashlaymiz-ku”, — deydi hamshiralar), binoning ichki qismlarini ta’mirlatgan.

Darvoqe, shifoxona butkul e’tibordan chetda qolgan deyish ham to‘g‘ri emas. “Tuman tibbiyot birlashmasi tomonidan ham mablag‘lar ajratilgan — shu mablag‘larga evaziga binoning tom qismi, eshik-derazalar, eski ‘rakovina’ va quvurlar almashtirildi, hojatxona ta’mirlandi”, — deydi bosh shifokor (ammo go‘yoki yangilangan “rakovina”ni ko‘rib, yig‘laging keladi, quvurlar nosoz, hojatxona va yuvinish xonalari ham achinarli ahvolda).

Uning bu so‘zlarini Vobkent tuman tibbiyot birlashmasi boshlig‘i Shuhrat Rajabov ham tasdiqladi. Uning so‘zlariga ko‘ra, 2019-yili tomni yangilash uchun 70 million so‘m, 2020-yili esa bino ichkarisini kosmetik ta’mirlash uchun jami 40 million so‘m ajratilgan.

Bunday bunday tibbiyot muassasalari bitta emas

Vobkentda jami 18 ta davolash-profilaktika muassasasi bor. Tuman hokimi Farhod Umarov “Daryo” muxbiri bilan suhbatda sharoiti “Paxtakor” oilaviy shifokor punktinikiga o‘xshash (qoniqarsiz) tibbiyot muassasalari tumanda bir emas, bir nechta ekanini yashirmadi. Masalan, xom g‘ishtdan qurilgan “Voshi”, “Yangikent” va “Cho‘rikalon” oilaviy shifokorlik punktlarini ham yangilash kerak, “O‘zbakon”, “Guliston”, “Pushmon” tibbiy xizmat uylarining binolari ham “og‘riqli nuqta” bo‘lib turibdi.

“Barchasi joriy ta’mirlanishga kelib qolgan. Ularni bosqichma-bosqich to‘liq qayta tiklash va kapital ta’mirlash ishlari amalga oshirilishi rejalashtirilgan”, — dedi hokim. Uning ta’kidlashicha, hozirgacha tuman markaziy kasalxonasida 396 million so‘m evaziga hushyorxona binosi qurib, foydalanishga topshirilgan, qariyb 1,5 milliard so‘m evaziga markazlashgan kislorod stansiya ishga tushirilgan. “Shohnigor”, “Teraklik”, “Nayman” oilaviy shifoxona punktlari to‘liq qayta ta’mirlangan.

Tuman tibbiyot birlashmasi boshlig‘i Shuhrat Rajabovning qo‘shimcha qilishcha, “Paxtakor” oilaviy shifokorlik punkti Vazirlar Mahkamasining 2021-yil 22-apreldagi “2021—2023-yillarda Buxoro viloyatining Vobkent tumanini kompleks ijtimoiy-iqtisodiy rivojlantirish va kambag‘allikni qisqartirish chora-tadbirlari to‘g‘risida”gi qarori asosida 2023-yilda respublika budjeti hisobidan 1,2 milliard so‘m mablag‘ evaziga rekonstruksiya qilinishi ko‘zda tutilgan.