Tesla бош директори Илон Маск компаниядаги улушини қисқартиришда давом этмоқда, 23 ноябрь куни у яна 1,05 миллиард долларлик акцияларини сотди, деб ёзади «Интерфакс».
АҚШ Қимматли қоғозлар ва биржа комиссиясига (SЕC) тақдим этилган ҳужжатларга кўра, Маск 23 ноябрь куни Tesla’нинг 934 минг дона акциясини сотган.
Маск ноябрь ойида Tesla акцияларини сотишни бошлади. 8 ноябрь куни у Twitter’даги обуначилари орасида сўровнома ўтказган. Унда бизнесмен обуначилардан Tesla акцияларининг 10 фоизини сотиш керакми ёки йўқлигини сўраган ва ҳар қандай ҳолатда овоз бериш натижаларига риоя қилишга ваъда берган. У акцияларни сотиш солиқ тўлашнинг ягона йўли, деб айтган. Респондентларнинг деярли 58 фоизи акцияларни сотиш учун овоз берган, унда 3,5 миллиондан ортиқ киши иштирок этган.
Шундан буён Маск 9,85 миллиард долларлик 9,2 миллионта қимматли қоғозларни реализация қилди.
Сўровдан олдин Маск Tesla акцияларининг 17 фоиздан кўпроғига эгалик қиларди. Унинг улуши қиймати 200 миллиард доллардан ошиқроққа, улушдаги 10 фоизлик пакет (тахминан 17 миллионта акция) эса қарийб 21 миллиард долларга баҳоланган эди. Шундай қилиб, 10 фоизлик пакет реализация қилиниши учун Маск Tesla’нинг яна 7,9 миллионга яқин акциясини сотиши керак бўлади.
Tesla акциялари 8 ноябрдан бери 9 фоизга арзонлашди. 23 ноябрь куни уларнинг қиймати 4,1 фоизга тушди.
The Wall Street Journal’нинг ҳисоб-китобларига кўра, Маск Tesla акцияларининг сўнгги пайтларда амалга оширилган сотувидан тахминан 3,5 миллиард доллар солиқ тўлаши керак бўлади, агар унинг Twitter’даги сўровидан кейин акциялар нархи пасаймаганида, янада кўпроқ солиқ тўлаши мумкин эди. Tesla акциялари қийматининг пасайиши Маскнинг 480 миллион долларга яқин маблағини тежаб қолди, деб ёзади газета.
Мавзуга доир:
Изоҳ (0)