“Barselona”ga qaytishi mumkinligi, Ronaldu bilan raqobati va Mbappening “Real”ga o‘tishi haqida — Lionel Messi bilan intervyu

“PSJ” hujumchisi Lionel Messi Ispaniyaning Marca nashriga katta intervyu berdi. Intervyu davomida argentinalik daho sobiq klubi “Barselona”, Krishtianu Ronaldu bilan raqobati, qachondir yana katalon klubiga qaytishi mumkinligi va bir qator boshqa mavzularda gapirdi. Quyida mazkur intervyu o‘zbek tilida taqdim etiladi.

Chempionlar Ligasi favoritlari haqida

Ko‘pchilik bizni musobaqa favoriti deb biladi. “PSJ”ning g‘alabaga asosiy da’vogarlardan biri ekanini inkor etmayman, biroq biz buning uchun haqiqiy jamoaga aylanishimiz kerak. Albatta, bosh sovrinni qo‘lga kiritishi mumkin bo‘lgan boshqa klublar ham bor. Chempionlar Ligasi — juda murakkab musobaqa va aynan shu narsa uni o‘ziga xos qiladi. “PSJ” favoritlardan biri, ammo bu yo‘lda yagona emas. “Liverpul” yana bir necha yil oldin Chempionlar Ligasida g‘olib chiqqan o‘sha jamoani eslatib yubormoqda. Bundan tashqari, “Bavariya”, “Manchester Siti”, “Atletiko M”, “Real” kabi jamoalar ham bor.

“Barselona” haqida

“Barselona” qayta qurish bosqichidan o‘tmoqda, jamoada ko‘plab yosh futbolchilar bor. Menimcha, bugungi kunda “Barsa”dan yaxshiroq klublar bor. Lekin biz Xavining kelganini, jarohatlar sonining oshib ketganini ham hisobga olishimiz kerak. Agar “Barselona” hozir kuchli taassurot qoldirmayotgan bo‘lsa, bu keyin ham shunday bo‘ladi degani emas. Jamoa o‘sishga va rivojlanishga qodir.

“Barselona”ning turnir jadvalidagi hozirgi holatidan xafaman (jamoa La Ligada 20 ochko bilan 7-o‘rinni egallab turibdi). Men har doim jamoaga eng yaxshisini tilayman. Hozir u yerda o‘ynamayapman. Lekin klubning muxlisi bo‘lib qolaveraman. Qolaversa, u yerda do‘stlarim, hamkasblarim qolgan. “Barsa”ning muvaffaqiyat qozonishini xohlayman. Jamoa o‘z mavqeyini yana yaxshilashiga shubha qilmayman.

Krishtianu Ronaldu haqida“Manchester Yunayted” — ajoyib futbolchilarga ega juda kuchli jamoa. Krishtianu Angliyaga qaytganidan keyin moslashish bilan bog‘liq muammolarga duch kelmadi, u birinchi o‘yinlardayoq gollar urdi. “Manchester Yunayted” Premyer Ligada unchalik ham yaxshi o‘yin ko‘rsatayotgani yo‘q, lekin bu juda kuchli liga. Kelajakda hamma narsa sodir bo‘lishi mumkin. Ronaldu bilan bir chempionatda qatnashmaganimizga ancha bo‘ldi. Bu biz uchun ham, muxlislar uchun ham ajoyib to‘qnashuv bo‘lgandi. Bunday xotiralar futbol tarixida abadiy qoladi.

Kilian Mbappye haqidaTo‘g‘risini aytsam, Mbappe “Real”ga o‘tadimi yoki yo‘qmi, bilmayman. Uning hayolida nima borligini faqat Kilianning o‘zi biladi. Faqat uning joriy mavsumda “PSJ”da qolganidan xursand ekanimni aytishim mumkin. U jamoa uchun juda muhim futbolchi hisoblanadi. Uning o‘zi kelajagi haqida mavsum oxirida qaror qabul qiladi.

Serxio Ramos haqida

Avvaliga menda g‘alati tuyg‘u paydo bo‘lgandi. Boisi biz shuncha yil davomida “Barselona” va “Real”da o‘ynab, bir-birimizga qarshi bo‘lganmiz. Endi esa bir jamoada to‘p suryapmiz. Biroq barcha qarama-qarshiliklar o‘tmishda qoldi, biz har doim bir-birimizni juda qattiq hurmat qilganmiz. U imkon qadar tezroq safga qaytadi deb umid qilaman. Parijda men uning ajoyib inson ekanini anglab yetdim.

Xavi haqida

Xavi jamoa rivojiga katta hissa qo‘shishga qodir. U murabbiy sifatida ko‘p narsani biladi. Bundan tashqari, u bolaligidan Barselonada yashagan. Uni muxlis va futbolchilar juda hurmat qiladi. Xavi yosh futbolchilar uchun o‘rnak bo‘ladi. U bilan jamoa oldinga qadam tashlay oladi, bunga shubham yo‘q.

Ronald Kumanning ishdan bo‘shatilishi haqida

Murabbiylar har doim qandaydir darajada adolatsiz munosabatga duch keladi. Kuman bilan ham shunday bo‘ldi, bungacha Ernesto Valverdega ham shu kabi munosabat bo‘lgandi. Klub yomon o‘yin ko‘rsatsa, eng oson yo‘l murabbiyni almashtirishdir. Kuman “Barsa”ni o‘ta og‘ir vaqtda, bir qancha top futbolchilar jamoadan ketganida qabul qilgandi. Aytganimdek, eng oson yo‘li, barcha muvaffaqiyatsizliklarda murabbiyni ayblash. Ammo ular o‘zini oldinda nimaga kutayotganini biladi.

“Barselona”ga qaytishi mumkinligi haqida

Har doim, bir kun kelib “Barselona”ga qaytishimni aytganman, chunki bu mening uyim va u yerda yashamoqchiman. Agar klubga o‘z hissamni qo‘shib, unga yordam bera olsam, shubhasiz, mamnuniyat bilan u yerga qaytgan bo‘lardim.