Versal jinoiy sudi “Real” hujumchisi Karim Benzemani “Olimpiakos” futbolchisi Matyo Valbuenaning intim munosabatlari aks etgan videosini tarqatishda ishtirok etgani uchun aybdor deb topdi.
Benzemadan tashqari ushbu voqeada yana to‘rt kishi ishtirok etgan. Karim o‘z aybiga iqror bo‘ldi. Sud qaroriga ko‘ra, futbolchi o‘z qilmishining jinoiy mohiyatini tushunmagan.
Fransiyalik hujumchiga nisbatan bir yillik shartli qamoq jazosi va 75 ming yevro miqdorida jarima belgilandi. Bu unga nisbatan berilishi mumkin bo‘lgan maksimal jazo. Prokuror fransuzga nisbatan 10 oylik qamoq va 75 ming yevro miqdorida jarima belgilanishini talab qilgan.
Benzemaning advokati Silven Korme o‘z mijoziga nisbatan qaror chiqargan sudga e’tiroz bildirdi.
“Sud mijozimning o‘z harakatini jinoiy mohiyatini tushunmaganini aytib o‘tdi. Bu dalillarsiz chiqarilgan qattiq va adolatsiz qaror. Biz apellyatsiya beramiz va qarorga e’tiroz bildiramiz. Benzemaning uyaladigan narsasi yo‘q. U apellyatsiya sudida oqlanadi”, — deydi Silven Korme.
Ma’lumot uchun, 2015-yilda noma’lum shaxslar Valbuenaning ishqiy munosabatlari tasvirlangan videoni tarqatib yuborish bilan qo‘rqitib, undan pul talab qilgani ma’lum bo‘lgandi. Benzema esa jinoyatchilar va Valbuena o‘rtasida vositachi bo‘lganlikda gumon qilingan.
Eslatib o‘tamiz, mazkur hodisa tufayli har ikki futbolchi terma jamoadan chetlatilgan hamda Fransiyada o‘tgan Yevro—2016 va Rossiyadagi JCh—2018 musobaqalarini o‘tkazib yuborgandi. Karim Benzema 6 yillik tanaffusdan so‘ng, Fransiya terma jamoasidan chaqiruv oldi va Yevro—2020 da ishtirok etdi.
Izoh (0)