Noyabr oyi o‘rtalarida ijtimoiy tarmoqlarda Chevrolet Captiva-5 avtomobili uchun to‘lov qilgan xaridorlar avtosalonlar va UzAuto Motors mas’ullari bilan bog‘lanib, ularga mashina go‘yoki “mintaqamizga to‘g‘ri kelmagani uchun” yetkazib berilmasligi, to‘lovni yo butunligicha qaytarib olish yoki boshqa model xaridi uchun yo‘naltirish tavsiya etilayotgani haqida xabarlar tarqalgan edi. Oradan salkam bir hafta o‘tib, UzAuto Motors kompaniyasi Captiva-5 bo‘yicha shartnomalar tuzishni to‘xtatishga “majbur bo‘layotgani”ni e’lon qildi.
“Bunday holat kompaniya tarixida birinchi bor yuz berishi... Shu munosabat bilan UzAuto Motors rahbariyati va jamoasi o‘z mijozlaridan keltirilgan noqulayliklar uchun cheksiz uzr so‘raydi”, — deyiladi kompaniyaning 20-noyabrdagi bayonotida.
Unda tuzilgan shartnomalar bo‘yicha barcha mablag‘lar mijozlar murojaatidan keyingi uch kun ichida to‘liq qaytarilishi, shuningdek, oldindan to‘lov summasining 5 foizi miqdorida kompensatsiya puli berilishini bildirgan.
UzAuto Motors narxi 192,7 million so‘mdan boshlanadigan yangi avlod Captiva’lari uchun shartnoma tuzishni 28-sentabrda boshlagan edi. Kompaniya 20-noyabrdagi bayonotida Captiva-5 sotuvlari sentabr oyida qanday asos bilan boshlangani va oradan ikki oy o‘tar-o‘tmas ushbu yo‘ltanlamas savdosi nima sababdan to‘xtatilganiga aniqlik kiritmagan.
UzAuto Motors kompaniyasi matbuot xizmati rahbari Sardor Isxakov “Daryo” muxbiri bilan suhbatda Captiva-5 ning sotuvdan olinishi sabablarini ochiqlay olmasligini, bu borada hech qanday izoh bermasligini ma’lum qildi.
“Biz shartnomalarni qonunda ko‘rsatilgan tartibda bekor qildik, 5 foizlik kompensatsiya esa mijozlarga yetkazilgan noqulaylik uchun to‘lanmoqda. Bu summa Captiva-5 xaridi uchun shartnoma bank krediti orqali rasmiylashtirilgan bo‘lsa, o‘tgan muddat uchun kredit to‘lovlarini qoplashga yetadi”, — dedi u.
Ta’kidlanishicha, 20-noyabrgacha Captiva-5 sotib olish uchun jami 454 ta shartnoma tuzilgan (shundan 21 tasi kredit shaklida), ammo O‘zbekiston bozorida hozirgacha UzAuto Motors tomonidan birorta ham Captiva-5 sotilmagan. O‘zbekistondagi Captiva-5 larga UzAuto Motors’ning aloqasi yo‘qligi avval ham aytilgan edi — 2021-yil mart oyida Toshkent ko‘chalarida paydo bo‘lgan Captiva-5 lar bo‘yicha “Daryo”ga izoh berarkan, “O‘zavtosanoat” vakili: “Kimdir o‘z shaxsiy ehtiyoji uchun chetdan olib kelgan bo‘lishi mumkin”, — degandi.
Ma’lumot uchun, Captiva modeli O‘zbekiston bozoriga 2007-yilda kirib kelgan. O‘sha yilning oktabrida mamlakatda avtomobilni yig‘ish yo‘lga qo‘yilgan. 2011-yilning sentabri va 2017-yilning fevralida model yangilangan. 2018-yilning sentabrida esa GM’ning global strategiyasiga muvofiq uni ishlab chiqarish to‘xtatilgan.
Izoh (0)