O‘zbekistonda so‘nggi kunlarda xabar berilgan yo‘l-transport hodisalari haqida batafsil ma’lumot taqdim etamiz.
Surxondaryoda Damas piyoda o‘limiga sabab bo‘ldi.
2021-yil 17-noyabr kuni kechki soat 19:10 larda “Navro‘z” mahallasidan o‘tuvchi 4R–23Z avtomobil yo‘lining 4-kilometrida Angor tumani “Guliston” mahallasida yashovchi fuqaro (1992-yilda tug‘ilgan) o‘ziga tegishli bo‘lgan Damas avtomashinasi bilan Angor–Termiz yo‘nalishi bo‘ylab harakatlanib borib, yo‘lning chap tomonidan o‘ng tomoniga o‘tayotgan Termiz tumanida yashagan fuqaroni (1982-yilda tug‘ilgan) urib ketib yo‘l-transport hodisasi sodir etgan.
Oqibatda piyoda tan jarohati olib, Angor tumanidagi shifoxonada vafot etgan.
Namanganda ham piyoda YTH oqibatida halok bo‘ldi.
2021-yil 15-noyabr kuni soat 15:20 larda, Pungon–Namangan yo‘lining 42 kilometrida, To‘raqo‘rg‘on tumani “Shoxidon” MFY hududida, To‘raqo‘rg‘on tumanida yashovchi, fuqaro (2000-yilda tug‘ilgan) Nexia-2 avtomashinasini boshqarib borayotib, harakat xavfsizligini ta’minlay olmay, yo‘lni kesib o‘tayotgan piyoda, To‘raqo‘rg‘on tumanida yashovchi fuqaroni (1969-yilda tug‘ilgan) urib yuborgan.
Oqibatda piyoda olgan tan jarohati oqibatida shifoxonada vafot etgan.
Ushbu holat bo‘yicha To‘raqo‘rg‘on tuman IIB huzuridagi TB tomonidan 2021-yil 15-noyabr kuni Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilgan.
Tezlikni oshirgan Spark haydovchisi Cobalt bilan to‘qnashuvda vafot etdi.
2021-yil 15-noyabr kuni soat taxminan 07:00 larda Sho‘rchi tumanida tezlikni meyordan oshirgan Spark avtomobili qarama–qarshi yo‘nalishda kelayotgan Cobalt avtomobili bilan to‘qnashgan.
Oqibatda Spark haydovchisi voqea joyida vafot etgan.
Yuk mashinasi bilan to‘qnashib yonib ketgan Nexia haydovchisi vafot etdi.
2021-yilning 19-noyabr kuni soat 14:25 larda Sirdaryo viloyati, Mirzaobod tumani hududidan o‘tuvchi M-34 avtomobil yo‘lining 132-kilometrida haydovchi, A.N. boshqaruvidagi Nexia hamda haydovchi, N.Q. boshqaruvidagi “Zil-MMZ 554” yuk avtomobili ishtirokida to‘qnashuv sodir bo‘lgan va Nexia avtomobilida yong‘in yuzaga kelgan.
To‘qnashuv va yong‘in oqibatida Nexia avtomobil haydovchisi A.N. olgan og‘ir tan jarohatlari tufayli voqea joyida vafot etgan.
Mazkur YTH yuzasidan Mirzaobod tumani IIB huzuridagi TB tomonidan tergovga qadar tekshiruv harakatlari olib borilmoqda.
Izoh (0)