Ноябрь ойи ўрталарида ижтимоий тармоқларда Chevrolet Captiva-5 автомобили учун тўлов қилган харидорлар автосалонлар ва UzAuto Motors масъуллари билан боғланиб, уларга машина гўёки «минтақамизга тўғри келмагани учун» етказиб берилмаслиги, тўловни ё бутунлигича қайтариб олиш ёки бошқа модель хариди учун йўналтириш тавсия этилаётгани ҳақида хабарлар тарқалган эди. Орадан салкам бир ҳафта ўтиб, UzAuto Motors компанияси Captiva-5 бўйича шартномалар тузишни тўхтатишга «мажбур бўлаётгани»ни эълон қилди.
«Бундай ҳолат компания тарихида биринчи бор юз бериши... Шу муносабат билан UzAuto Motors раҳбарияти ва жамоаси ўз мижозларидан келтирилган ноқулайликлар учун чексиз узр сўрайди», — дейилади компаниянинг 20 ноябрдаги баёнотида.
Унда тузилган шартномалар бўйича барча маблағлар мижозлар мурожаатидан кейинги уч кун ичида тўлиқ қайтарилиши, шунингдек, олдиндан тўлов суммасининг 5 фоизи миқдорида компенсация пули берилишини билдирган.
UzAuto Motors нархи 192,7 миллион сўмдан бошланадиган янги авлод Captiva’лари учун шартнома тузишни 28 сентябрда бошлаган эди. Компания 20 ноябрдаги баёнотида Captiva-5 сотувлари сентябрь ойида қандай асос билан бошлангани ва орадан икки ой ўтар-ўтмас ушбу йўлтанламас савдоси нима сабабдан тўхтатилганига аниқлик киритмаган.
UzAuto Motors компанияси матбуот хизмати раҳбари Сардор Исхаков «Дарё» мухбири билан суҳбатда Captiva-5 нинг сотувдан олиниши сабабларини очиқлай олмаслигини, бу борада ҳеч қандай изоҳ бермаслигини маълум қилди.
«Биз шартномаларни қонунда кўрсатилган тартибда бекор қилдик, 5 фоизлик компенсация эса мижозларга етказилган ноқулайлик учун тўланмоқда. Бу сумма Captiva-5 хариди учун шартнома банк кредити орқали расмийлаштирилган бўлса, ўтган муддат учун кредит тўловларини қоплашга етади», — деди у.
Таъкидланишича, 20 ноябргача Captiva-5 сотиб олиш учун жами 454 та шартнома тузилган (шундан 21 таси кредит шаклида), аммо Ўзбекистон бозорида ҳозиргача UzAuto Motors томонидан бирорта ҳам Captiva-5 сотилмаган. Ўзбекистондаги Captiva-5 ларга UzAuto Motors’нинг алоқаси йўқлиги аввал ҳам айтилган эди — 2021 йил март ойида Тошкент кўчаларида пайдо бўлган Captiva-5 лар бўйича «Дарё»га изоҳ бераркан, «Ўзавтосаноат» вакили: «Кимдир ўз шахсий эҳтиёжи учун четдан олиб келган бўлиши мумкин», — деганди.
Маълумот учун, Captiva модели Ўзбекистон бозорига 2007 йилда кириб келган. Ўша йилнинг октябрида мамлакатда автомобилни йиғиш йўлга қўйилган. 2011 йилнинг сентябри ва 2017 йилнинг февралида модель янгиланган. 2018 йилнинг сентябрида эса GM’нинг глобал стратегиясига мувофиқ уни ишлаб чиқариш тўхтатилган.
Изоҳ (0)