O‘zbekiston Respublikasi Prezidenti Shavkat Mirziyoyevning Rossiya Federatsiyasiga tashrifi oldidan tashkil etilgan biznes forumda VEB.RF — Rossiya davlat rivojlanish korporatsiyasi hamda Olmaliq kon-metallurgiya kombinati o‘rtasida kredit bitimi tuzishga kelishilgan edi.
Mazkur kelishuv asosida 2021-yil 18-noyabr kuni VEB.RF kuzatuv kengashi rahbari o‘rinbosari D. V. Algulyan va “Olmaliq kon-metallurgiya kombinati” AJ boshqaruvi raisi Abdulla Xursanov 712 million yevro(824,3 million dollar) miqdoridagi kredit bitimini imzolashdi.
Ushbu kredit mablag‘i 3-mis boyitish fabrikasi qurilishiga yo‘naltiriladi.
Mablag‘lar loyiha doirasida Rossiya uskunalari va xizmatlari uchun, shuningdek, loyihani amalga oshirish bilan bog‘liq O‘zbekiston Respublikasidagi xarajatlarning bir qismiga yo‘naltiriladi.
Loyihaning 2-bosqichini hisobga olgan holda OKMK rudani qayta ishlash hajmini yiliga 160 million tonnaga yetkazishni rejalashtirmoqda. Bu esa 2028-yilga kelib, mis katodi ishlab chiqarishni yiliga 400 ming tonnaga yetkazish imkonini beradi. Shuningdek, OKMK tomonidan 2028-yilda yiliga oltin ishlab chiqarish 3 baravarga, kumush ishlab chiqarish 2 baravarga ortadi.
OKMK boshqaruvi raisi Abdulla Xursanov:
“Rossiyaning VEB korporatsiyasi moliyaviy ko‘magi asosida amalga oshirilayotgan 3-mis boyitish fabrikasining qurilishi O‘zbekistondagi eng yirik loyiha hisoblanadi. E’tiborlisi, ushbu kredit kombinatga davlat kafolatisiz va ta’minotisiz imtiyozli shartlar asosida taqdim etildi. Mazkur loyiha kombinat taraqqiyotining yangi bosqichga qadam qo‘yganini bildiradi. Biz kombinat istiqboli yo‘lida Rossiya banklari va korxonalari bilan hamkorlikni davom ettiramiz”.
Ma’lumot sheriklik huquqi asosida tayyorlandi.
Izoh (0)