Ўзбекистон Республикаси Президенти Шавкат Мирзиёевнинг Россия Федерациясига ташрифи олдидан ташкил этилган бизнес форумда VEB.RF — Россия давлат ривожланиш корпорацияси ҳамда Олмалиқ кон-металлургия комбинати ўртасида кредит битими тузишга келишилган эди.
Мазкур келишув асосида 2021 йил 18 ноябрь куни VEB.RF кузатув кенгаши раҳбари ўринбосари Д. В. Алгулян ва «Олмалиқ кон-металлургия комбинати» АЖ бошқаруви раиси Абдулла Хурсанов 712 миллион евро(824,3 миллион доллар) миқдоридаги кредит битимини имзолашди.
Ушбу кредит маблағи 3-мис бойитиш фабрикаси қурилишига йўналтирилади.
Маблағлар лойиҳа доирасида Россия ускуналари ва хизматлари учун, шунингдек, лойиҳани амалга ошириш билан боғлиқ Ўзбекистон Республикасидаги харажатларнинг бир қисмига йўналтирилади.
Лойиҳанинг 2-босқичини ҳисобга олган ҳолда ОКМК рудани қайта ишлаш ҳажмини йилига 160 миллион тоннага етказишни режалаштирмоқда. Бу эса 2028 йилга келиб, мис катоди ишлаб чиқаришни йилига 400 минг тоннага етказиш имконини беради. Шунингдек, ОКМК томонидан 2028 йилда йилига олтин ишлаб чиқариш 3 бараварга, кумуш ишлаб чиқариш 2 бараварга ортади.
ОКМК бошқаруви раиси Абдулла Хурсанов:
«Россиянинг VEB корпорацияси молиявий кўмаги асосида амалга оширилаётган 3-мис бойитиш фабрикасининг қурилиши Ўзбекистондаги энг йирик лойиҳа ҳисобланади. Эътиборлиси, ушбу кредит комбинатга давлат кафолатисиз ва таъминотисиз имтиёзли шартлар асосида тақдим этилди. Мазкур лойиҳа комбинат тараққиётининг янги босқичга қадам қўйганини билдиради. Биз комбинат истиқболи йўлида Россия банклари ва корхоналари билан ҳамкорликни давом эттирамиз».
Маълумот шериклик ҳуқуқи асосида тайёрланди.
Изоҳ (0)