Gruziya sobiq prezidenti Mixail Saakashvili Gori shahridagi harbiy gospitalga ko‘chirildi. Muassasa hududiga ikkita renimobil va politsiya avtomobillari kirgan, deb xabar beradi “Kommersant”.
Avvalroq adliya vaziri Rati Bregadze davolanish kursi tugaganidan keyin Saakashvili Rustavi qamoqxonasiga o‘tkazilishini ma’lum qilgandi.
19-noyabr kuni 49 kundan beri ochlik saqlab kelayotgan Saakashvili advokati bilan uchrashuv vaqtida yiqilib tushib, hushidan ketgani haqida xabar berilgandi. Yiqilgach, u ko‘zini ochmagan va hech narsani sezmagan. Saakashvilini “nosilka”da olib ketishgan. U qamoqxona shifoxonasining jonlantirish bo‘limiga yotqizilgan.
Saakashvilining shaxsiy shifokori Nikoloz Kipshidze Gruziya sobiq prezidentining ahvoli keskin yomonlashganini ma’lum qilgan. Shifokorning so‘zlariga ko‘ra, organizmdagi endokrinologik va metabolik o‘zgarishlar natijasida yuzaga kelgan teri sarg‘ayishi avvalgi kunlarga nisbatan kuchaygan. Doktor Kipshidze yaqin kunlarda bu o‘zgarishlar tuzatib bo‘lmas holga kelishidan xavotirda edi.
Izoh (0)