Davlat tashkilotida ishlamaydigan ayollar uchun homiladorlik va tug‘ish bo‘yicha nafaqa davlat tomonidan to‘lanishi mumkinmi?

Oliy Majlis Qonunchilik palatasining yalpi majlisida “2022-yil uchun O‘zbekiston Respublikasining davlat budjeti to‘g‘risida”gi qonuni loyihasi muhokama etildi. Qonun loyihasi Xalq demokratik partiyasi fraksiyasi yig‘ilishida ham atroflicha ko‘rib chiqildi.

Yig‘ilishda 2022-yil uchun davlat budjeti ijtimoiy yo‘naltirilgani bilan alohida ahamiyatga ega ekani alohida ta’kidlandi. Xususan, partiya elektorati bo‘lgan kam ta’minlangan oilalarga hamda ijtimoiy nafaqalar, moddiy yordam va kompensatsiya to‘lovlari xarajatlariga 9,9 trillion so‘m ajratish ko‘zda tutilgan bo‘lib, bu kelgusi yilda ijtimoiy himoyaga muhtoj fuqarolarga moddiy yordam berish, bolali oilalarga barcha turdagi ijtimoiy nafaqalarni to‘lash, kam ta’minlangan oilalarga moddiy yordam ko‘rsatish, bolalikdan nogironlarga nafaqalar to‘lash imkonini beradi.

Budjet loyihasining ijtimoiy yo‘naltirilganligi Xalq demokratik partiyasi dasturiy maqsadlariga va elektoratimiz manfaatlariga mos va hamohangdir. Loyiha asosida har bir fuqaro uchun munosib turmush sharoiti va zamonaviy infratuzilma tashkil etish, malakali tibbiy xizmat ko‘rsatish, sifatli ta’lim, ijtimoiy himoya tizimini yaratib berish ko‘zda tutilayotgani e’tiborga molik.

Qonun loyihasi bo‘yicha Xalq demokratik partiyasi fraksiyasi a’zolari tomonidan bir qator fikr-mulohaza va takliflar bildirildi.

Xususan, deputatlar 2022-yilgi budjetda nazarda tutilmagan bir masalaga e’tibor qaratdi. Budjet tashkilotlarida ishlovchi ayollarga homiladorlik va tug‘ish bo‘yicha nafaqa davlat tomonidan to‘lanmoqda, boshqa tashkilotlarda ishlovchi ayollarga esa to‘lov ish beruvchilar tomonidan amalga oshirilmoqda. Bu esa nobudjet sohadagi ish beruvchilar tomonidan ayollarni ishga qabul qilmaslikka (ayniqsa, homiladorlik davrida) va ayollarning mehnat qilish huquqining cheklanishiga sabab bo‘lmoqda. Ish bilan band bo‘lmaganlarga esa bu turdagi nafaqa umuman to‘lanmaydi.

Fraksiya a’zolari tomonidan barcha ayollar uchun homiladorlik va tug‘ish bo‘yicha nafaqa davlat tomonidan to‘lanishi lozimligi haqida hukumatga taklif berildi.

Xalq demokratik partiyasi taklif va mulohazalardan so‘ng “2022-yil uchun O‘zbekiston Respublikasining davlat budjeti to‘g‘risida”gi qonun loyihasini ma’qulladi.

Reklama huquqi asosida.