Давлат ташкилотида ишламайдиган аёллар учун ҳомиладорлик ва туғиш бўйича нафақа давлат томонидан тўланиши мумкинми?

Олий Мажлис Қонунчилик палатасининг ялпи мажлисида «2022 йил учун Ўзбекистон Республикасининг давлат бюджети тўғрисида»ги қонуни лойиҳаси муҳокама этилди. Қонун лойиҳаси Халқ демократик партияси фракцияси йиғилишида ҳам атрофлича кўриб чиқилди.

Йиғилишда 2022 йил учун давлат бюджети ижтимоий йўналтирилгани билан алоҳида аҳамиятга эга экани алоҳида таъкидланди. Хусусан, партия электорати бўлган кам таъминланган оилаларга ҳамда ижтимоий нафақалар, моддий ёрдам ва компенсация тўловлари харажатларига 9,9 триллион сўм ажратиш кўзда тутилган бўлиб, бу келгуси йилда ижтимоий ҳимояга муҳтож фуқароларга моддий ёрдам бериш, болали оилаларга барча турдаги ижтимоий нафақаларни тўлаш, кам таъминланган оилаларга моддий ёрдам кўрсатиш, болаликдан ногиронларга нафақалар тўлаш имконини беради.

Бюджет лойиҳасининг ижтимоий йўналтирилганлиги Халқ демократик партияси дастурий мақсадларига ва электоратимиз манфаатларига мос ва ҳамоҳангдир. Лойиҳа асосида ҳар бир фуқаро учун муносиб турмуш шароити ва замонавий инфратузилма ташкил этиш, малакали тиббий хизмат кўрсатиш, сифатли таълим, ижтимоий ҳимоя тизимини яратиб бериш кўзда тутилаётгани эътиборга молик.

Қонун лойиҳаси бўйича Халқ демократик партияси фракцияси аъзолари томонидан бир қатор фикр-мулоҳаза ва таклифлар билдирилди.

Хусусан, депутатлар 2022 йилги бюджетда назарда тутилмаган бир масалага эътибор қаратди. Бюджет ташкилотларида ишловчи аёлларга ҳомиладорлик ва туғиш бўйича нафақа давлат томонидан тўланмоқда, бошқа ташкилотларда ишловчи аёлларга эса тўлов иш берувчилар томонидан амалга оширилмоқда. Бу эса нобюджет соҳадаги иш берувчилар томонидан аёлларни ишга қабул қилмасликка (айниқса, ҳомиладорлик даврида) ва аёлларнинг меҳнат қилиш ҳуқуқининг чекланишига сабаб бўлмоқда. Иш билан банд бўлмаганларга эса бу турдаги нафақа умуман тўланмайди.

Фракция аъзолари томонидан барча аёллар учун ҳомиладорлик ва туғиш бўйича нафақа давлат томонидан тўланиши лозимлиги ҳақида ҳукуматга таклиф берилди.

Халқ демократик партияси таклиф ва мулоҳазалардан сўнг «2022 йил учун Ўзбекистон Республикасининг давлат бюджети тўғрисида»ги қонун лойиҳасини маъқуллади.

Реклама ҳуқуқи асосида.