Одам одамга ўхшайди, дейишади. Бироқ баъзида шундай вазиятларга дуч келамизки, ким аслида ким эканини ажратиш мушкул бўлиб қолади. Қуйида хорижий ва ўзбекистонлик машҳурларга икки томчи сувдек ўхшайдиган инсонлар ҳақида сўз юритамиз.
Қайси бири Аишвария Рай?
Машҳур ҳинд актрисаси, «Дунё гўзали» Аишвария Баччаннинг Ўзбекистондаги қиёфадоши Наргиза Азизова «Ассалом Ўзбекистон» кўрсатувининг бошловчиси ҳисобланади. У ака Шариф номи билан танилган актёр Толиб Хожиевнинг қизи. Икки фарзанднинг онаси бўлган телебошловчи ҳинд актрисасига ҳавас қилишини яширмайди.
— Ҳинд актрисасига ўхшашимни билганимга кўп бўлмади. Академик лицейда ўқишга борганимда курсдошларим «Девдас»даги Парога ўхшашимни айтишганди. Бу фильмни кўрмаганим ва ҳинд киносига унчалик қизиқмаганим учун гапларига эътибор бермадим. Орадан анча вақт ўтиб тасодифан телевизорда намойиш этилаётган «Девдас» фильмига кўзим тушиб қолган. Ҳақиқатан ҳинд актрисасига ўхшашимни ўшанда билганман. Атайин тақлид қилмайман, аммо унга ҳавасим келади. У идеалимдаги аёл десам ҳам бўлади, — дейди Наргиза Азизова.
«Райҳоннинг эгизаги бормиди?»
Муҳаббат Орипова ҳақиқатан ҳам хонанда Райҳонга ўхшайди. Баъзилар айтгандек, балки у ҳам хонанданинг имижига тақлид қилар. Аммо унга қараб, табиий ўхшашликларни ҳам пайқашингиз аниқ. Муҳаббат асли фарғоналик, бир неча йилдан буён Тошкент шаҳрида истиқомат қилади.
«Райҳонмисиз деган саволни кўп беришган. Баъзилар савол бермай зимдан кузатиш, папараци қилиб суратга олиш ҳолатлари ҳам кўп бўлади. Илк марта Райҳонга ўхшашлигимни Райҳоннинг Қўқондаги концертида билганман. Ҳаво совуқлиги учун Райҳон мухлислари билан кўришолмаган. Шунда битта мухлис мени кўрсатиб «Мана Райҳон» деган ва ҳамма келиб мен билан расмга тушган. Бундай ҳолатлар кўп марта бўлган», — дейди Муҳаббат Орипова.
«Мабодо, Учқун Тиллаевнинг укаси эмасмисиз?»
Ўзбекистонда хизмат кўрсатган артист Учқун Тиллаевнинг ўзи каби ижодкор қиёфадоши Самарқандда истиқомат қилади. Ҳаёт Ҳамидов бир неча йиллардан буён Самарқанд вилоятидаги Ҳамид Олимжон театрида актёр сифатида фаолият юритади.
«Мабодо, Учқун Тиллаевнинг қариндоши эмасмисиз, деган саволларни кўп беришган. Бир куни тўйда бир одам келиб ‘Сиз анув актёрга ўхшар экансиз?’ деди. Асабийлашиб турганим учунми қайси актёрга деб баландроқ гапириб юборибман. Нима дейишини билмай ‘Битта актёр сизга ўхшайди!’ деди. Ана энди тўғри айтдингиз, деб кулгандим», — дейди Ҳаёт Ҳамидов.
Муниса Ризаеванинг россиялик «опаси»
Муниса Ризаевани кўпчилик рус эстрада вакили Зарага ўхшатишади. Очиғини айтиш керак, илгари ҳақиқатан ҳам ўхшашлик даражаси юқори эди. Аммо кейинги пайтларда Муниса Ризаеванинг лаблари «бироз» катталашган. Аммо икки ижодкорнинг ташқи қиёфасида қандайдир умумийлик бор.
Шакиранинг ўзбекистонлик қиёфадоши
Шубҳасиз, актриса Мафтуна Холмуродова Шакирага тақлид қилади. Чунки унинг авваги қиёфаси бутунлай бошқача эди. Билишимизча, у бир неча йил Севинч Мўминовага тақлид қилиб, унинг қўшиқларини куйлаб юрган. Аммо Шакира ижросидаги чиқишлари омадлироқ чиққач, «Ўзбек Шакираси» номини олиш учун интилган. Қиёфада натижалар омадсиз эмас, аммо бундай имиж ва рақслар ўзбек санъати учун керакми, деган жумбоқли савол бор.
Оз бўлса-да ўхшашлик бор-ов!
Негадир кўпчилик хонанда Шербек Шодиевни машҳур футбол юлдузи Мессига ўхшатишади. Расмларни солиштирса ҳақиқатан ҳам қандайдир ўхшашлик бор.
Қайси бири Зарина Низомиддинова?
Қизиқчи Зокир Очилдиев «Изоҳ сиздан» дея мазкур суратни Instagram профилига жойлади. Мухлисларнинг аксарияти суратдаги инсонни марҳум ижодкор Ҳожибой Тожибоевга ўхшатди. Айримлар унинг Қашқадарё вилоятида исте’қомат қилиши, уни одамлар кўп йиллардан буён Ҳожибой Тожибоевга ўхшатишлари ҳақида изоҳ қолдирди.
Улуғбек Зиёвуддиновни Шерали Жўраевга ўхшатишади
Улуғбек Зиёвуддинов Улуғбек Мирзо тахаллуси билан ижод қилади. Унинг нафақат ташқи кўриниши, балки тор чалиши ҳам устоз санъаткорни эслатади.
«Аллоҳ бандани бир-бирига ўхшатади. Бир қиёфадас юз минглаб одамларни яратиши мумкин. Ташқи кўринишидан тортиб, феъл-атворигача бир хил бўлиши мумкин. Улуғ устоз тирик афсона, санъат коинотида сузиб юрган қуёшдек. Гўдаклигимдаёқ устознинг ўзига ҳам, санъатига ҳам ҳавас қилганман. Чин дилдан ҳавас қилсангиз, Аллоҳ беради. Устознинг ўзини, қўшиқларини, авлод-аждодларини яхши кўрамиз, улар учун доим дуодамиз», — дейди Улуғбек Зиёвуддинов.
Изоҳ (0)