Tashqi ishlar vaziri Abdulaziz Komilov O‘zbekiston—Yevropa Ittifoqi hamkorlik kengashi yig‘ilishi yakunlari bo‘yicha jurnalistlarning savollariga javob berdi. Savollarning aksariyati Afg‘onistondagi bugungi murakkab vaziyat va O‘zbekistonning “Tolibon” bilan munosabati haqida bo‘ldi.
Xususan, belgiyalik jurnalist Sadid Laylumning “Tolibon”ni terrorchilar deb ta’kidlagan savoliga TIV rahbari Markaziy Osiyo, Yevropa, AQSh, Janubiy Osiyo yoki boshqa mamlakatlarda “Tolibon” tomonidan uyushtirilgan teraktning birorta ham misoli ko‘rsata olmasligini aytib, javob berdi.
“‘Tolibon’ nafaqat Afg‘onistondagi asosiy kuch, balki afg‘on jamiyatining bir qismidir. Ular hech qachon milliy chegaralardan tashqarida terrorchilik hujumlarini uyushtirmagan. Markaziy Osiyoda, Yevropada, AQShda, Janubiy Osiyoda yoki boshqa joyda ‘Tolibon’ tomonidan uyushtirilgan teraktga bir misol keltira olmaysiz.
Hozirgi kunlar bu haqiqatdir. Sizda ko‘p savollar bor, lekin nima qilish kerakligi haqida hech qanday taklif yo‘q. Va shuning uchun biz hozirda real haqiqatni hisobga olib ish qilamiz. O‘tgan yigirma yil davomida, umuman, o‘tgan qirq yil davomida ham katta davlatlar Afg‘onistondagi vaziyatni to‘g‘rilay olmadi.
Endi ba’zi davlatlar bizga mablag‘ taklif qilmoqda va buning evaziga minglab qochqinlarni qabul qilishni so‘ramoqda. Nima bu? Biz tushunmadik? Afg‘onistondagi mavjud vaziyat uchun o‘tgan yigirma yil davomida kurashgan harbiy koalitsiya ham mas’ul ekanini ta’kidlab o‘tgan bo‘lardim.
Menimcha, sizda Afg‘oniston haqida yetarlicha yangilik va ma’lumot yo‘q, ehtimol, bu Yevropa bilan ‘Tolibon’ va umuman afg‘onlar bilan aloqa kanali yo‘qligi uchundir. Shuning uchun siz haqiqatni qabul qila olmaysiz, muvaqqat hukumat bilan hech qanday norasmiy aloqa o‘rnatolmaysiz. Ammo, shunga qaramay, aloqa kanali bo‘lishi kerak. Men shunday o‘ylayman.
O‘zbekiston kelajakda nimalar qiladi, degan savolingizga kelsak, biz bugun amal qilayotgan siyosatimizni davom ettiramiz”, – deya javob bergan Abdulaziz Komilov.
Izoh (0)