Ташқи ишлар вазири Абдулазиз Комилов Ўзбекистон—Европа Иттифоқи ҳамкорлик кенгаши йиғилиши якунлари бўйича журналистларнинг саволларига жавоб берди. Саволларнинг аксарияти Афғонистондаги бугунги мураккаб вазият ва Ўзбекистоннинг «Толибон» билан муносабати ҳақида бўлди.
Хусусан, бельгиялик журналист Садид Лайлумнинг «Толибон»ни террорчилар деб таъкидлаган саволига ТИВ раҳбари Марказий Осиё, Европа, АҚШ, Жанубий Осиё ёки бошқа мамлакатларда «Толибон» томонидан уюштирилган терактнинг бирорта ҳам мисоли кўрсата олмаслигини айтиб, жавоб берди.
«‘Толибон’ нафақат Афғонистондаги асосий куч, балки афғон жамиятининг бир қисмидир. Улар ҳеч қачон миллий чегаралардан ташқарида террорчилик ҳужумларини уюштирмаган. Марказий Осиёда, Европада, АҚШда, Жанубий Осиёда ёки бошқа жойда ‘Толибон’ томонидан уюштирилган терактга бир мисол келтира олмайсиз.
Ҳозирги кунлар бу ҳақиқатдир. Сизда кўп саволлар бор, лекин нима қилиш кераклиги ҳақида ҳеч қандай таклиф йўқ. Ва шунинг учун биз ҳозирда реал ҳақиқатни ҳисобга олиб иш қиламиз. Ўтган йигирма йил давомида, умуман, ўтган қирқ йил давомида ҳам катта давлатлар Афғонистондаги вазиятни тўғрилай олмади.
Энди баъзи давлатлар бизга маблағ таклиф қилмоқда ва бунинг эвазига минглаб қочқинларни қабул қилишни сўрамоқда. Нима бу? Биз тушунмадик? Афғонистондаги мавжуд вазият учун ўтган йигирма йил давомида курашган ҳарбий коалиция ҳам масъул эканини таъкидлаб ўтган бўлардим.
Менимча, сизда Афғонистон ҳақида етарлича янгилик ва маълумот йўқ, эҳтимол, бу Европа билан ‘Толибон’ ва умуман афғонлар билан алоқа канали йўқлиги учундир. Шунинг учун сиз ҳақиқатни қабул қила олмайсиз, муваққат ҳукумат билан ҳеч қандай норасмий алоқа ўрнатолмайсиз. Аммо, шунга қарамай, алоқа канали бўлиши керак. Мен шундай ўйлайман.
Ўзбекистон келажакда нималар қилади, деган саволингизга келсак, биз бугун амал қилаётган сиёсатимизни давом эттирамиз», – дея жавоб берган Абдулазиз Комилов.
Изоҳ (0)