O‘zbekistonda korrupsiya haqida xabar berganlarning qarindoshlari ham davlat himoyasida bo‘ladi. Bu haqda Adliya vazirligining “Huquqiy axborot” kanali xabar berdi.
Ma’lum qilinishicha, O‘zbekistonning korrupsiyaga qarshi kurashish tizimini takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risidagi qonun 18-noyabr kuni prezident tomonidan imzolandi.
Kiritilgan qo‘shimchalarga ko‘ra, Korrupsiyaga qarshi kurashish agentligi xodimlari korrupsiyaviy huquqbuzarliklar sodir etilishini o‘rganish va tahlil qilish uchun jazoni ijro etish muassasalariga moneliksiz kirishga, hujjatlar bilan tanishishga haqli ekani belgilandi.
Korrupsiyaga qarshi kurashish agentligi tomonidan har yili korrupsiyaga qarshi kurashish to‘g‘risidagi milliy ma’ruzani Oliy Majlisga taqdim etadi.
Endilikda korrupsiyaga oid huquqbuzarliklar to‘g‘risida axborot berayotgan shaxslarning qarindoshlari ham davlat himoyasida bo‘ladi (ilgari faqat xabar bergan shaxslar nazarda tutilgan.)
Qonun rasmiy e’lon qilingan kundan e’tiboran kuchga kiradi.
Eslatib o‘tamiz, O‘zbekistonda korrupsiya holatlari haqida Korrupsiyaga qarshi kurash agentligini xabardor qilish imkonini beruvchi maxsus dasturiy ta’minot ishlab chiqilgan.
Internet tarmog‘idagi mazkur “eanticor.uz” dasturi test rejimida ishga tushirilgan bo‘lib, unda korrupsiya holatlari haqidagi murojaatlarni to‘rtta shaklda, ya’ni:
- “Korrupsiyaga duch keldim va pora berishga majbur bo‘ldim”;
- “Korrupsiyaga duch keldim va pora bermadim”;
- “Pora bilan bog‘liq bo‘lmagan korrupsiyaga duch keldim”;
- “Halol ishlaydigan davlat xizmatchisini uchratdim” kabi mavzularda yuborish mumkin.
Izoh (0)