18-noyabr kuni Bosh prokuraturada kengaytirilgan hay’at yig‘ilishi bo‘lib o‘tdi. Videoselektor tarzida o‘tkazilgan majlisda prokuratura organlarining barcha tezkor xodimlari, prokuratura faxriylari hamda jamoatchilik kengashi a’zolari ishtirok etdi, deb xabar beradi idora matbuot xizmati.
Bosh prokurori Nig‘matilla Yo‘ldoshev ishtirok etgan hay’at yig‘ilishida mamlakatda qonuniylikni ta’minlash, jinoyatchilik va huquqbuzarliklarning oldini olish borasida yo‘l qo‘yilgan xato va kamchiliklar hududlar kesimida, aniq raqam va misollar asosida ko‘rsatib berilgan.
Yig‘ilishda prokuratura organlarining ba’zi xodimlari tomonidan sodir etilgan nojo‘ya va nomunosib xatti-harakatlar, shu jumladan, korrupsiyaviy holatlar hamda bularga imkon bergan sabab va shart-sharoitlar keskin tanqid qilingan. Viloyat, tuman (shahar) prokurorlari va ularga tenglashtirilgan prokurorlarning, departament va byuro rahbarlarining hisobotlari, tushuntirish va izohlari eshitilgan
Muhokama natijasiga ko‘ra, faoliyatida jiddiy xato va kamchiliklarga yo‘l qo‘ygan hamda xizmat vazifalariga sovuqqonlik bilan munosabatda bo‘lgan 18 nafar xodimlarga intizomiy jazo choralari qo‘llanilgan.
Shu bilan birga, xodimlar mas’uliyatini tubdan oshirish, prokuratura xodimi degan nomga dog‘ tushuruvchi nojo‘ya xatti-harakatlar sodir etmasliklari haqida qat’iy ogohlantirildi. Yig‘ilishda ko‘rsatib o‘tilgan xato va kamchiliklarga yo‘l qo‘ymaslik, xodimlar tomonidan o‘z xizmat burchiga mas’uliyat, sadoqat va halollik bilan yondashishlarini hamda har qanday qonun buzilishiga, ayniqsa, korrupsiya holatlariga qarshi murosasiz kurashishlarini ta’minlash borasida zarur chora-tadbirlar belgilandi”, — deyiladi xabarda.
Hay’atda ko‘rilgan masalalar yuzasidan tegishli qaror qabul qilingan.
Avvalroq Andijon prokuraturasi xodimi 15 ming dollar pora bilan qo‘lga tushgani, Samarqandda mansabdor shaxslar va huquqni muhofaza qiluvchi organ xodimlari rahbar bo‘lgan jinoiy guruh aniqlangani to‘g‘risida xabar berilgandi.
Izoh (0)