Toshkent shahrida tadbirkorning 1 milliard so‘mini o‘z ehtiyojlari uchun ishlatib yuborgan shaxs aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Yakkasaroy tuman bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Tekshiruv davomida fuqaro O.U. o‘zganing mulkini firibgarlik yo‘li bilan qo‘lga kiritish maqsadida “S-D” MChJ rahbari A.ning hisobida 2 milliard so‘m bo‘lgan plastik kartasini olib, pul mablag‘ini naqdlashtirib berishni va’da qilgani aniqlangan. Ushbu shaxs fuqaro A.ga 1 milliard so‘mini qaytarib, qolgan mablag‘ini qaytarmasdan, o‘z ehtiyojlari uchun sarflab yuborgan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Surxondaryoda 10 tonna sarimsoq piyozni olib, pulini bermay ketgan fuqaroga jinoyat ishi qo‘zg‘atilgani, Samarqandda tadbirkorlarning qariyb 550 mln so‘m pulini o‘zlashtirgan shaxslar aniqlangani to‘g‘risida xabar berilgandi.
Izoh (0)