Samarqandda fuqaroni 50 ming dollarga chuv tushirgan advokat yetti yil muddatga ozodlikdan mahrum qilindi. Bu haqda “Daryo”ga Jinoyat ishlari bo‘yicha Samarqand shahar sudi sudyasi Farruh Samatov ma’lum qildi.

Ma’lum bo‘lishicha, sudlanuvchi M.Sh. 2016-yildan 2019-yilning avgust oyiga qadar “Samarqand qonun ustuvorligi” advokatlar hay’ati advokati lavozimida ishlab kelgan. O‘tgan fursat davomida u o‘zining xizmat mavqeyidan foydalangan holda noqonuniy boylik orttirishni maqsad qilib, tanishi Shavkat Hatamovning ishini bitirib berishini aytgan va undan 50 ming dollar olib, o‘z ehtiyoji uchun sarflab yuborgan.

Ta’kidlanishicha, 2018-yilning 13-fevral kuni jinoyat ishlari bo‘yicha Urgut tuman sudi Shavkat Hatamovning qaynatasi Sh.A.ni Jinoyat kodeksining 276-moddasi 2-qismi “a” bandi (ko‘p miqdorda giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) va 246-moddasi 2-qismi (yadroviy, kimyoviy, biologik va ommaviy qirg‘in qurolining boshqa turlarini, shunday qurollarni yaratishda foydalanilishi mumkinligi ayon bo‘lgan material va moslamalarni, radioaktiv materiallarni, shuningdek, giyohvandlik vositalari, ularning analoglari yoki psixotrop moddalarni ko‘p miqdorda kontrabanda qilish) bilan aybdor deb topib, uni 12 yil muddatga ozodlikdan mahrum qilgan.

Shavkat Hatamov qaynatasiga yordam berish uchun advokatga murojaat qilgan. Advokat sudlanuvchi nisbatan qo‘yilgan ayblovni olib tashlash yoki boshqa yengil turdagi jazoga o‘zgartirib, ozodlikka chiqarib berishni va’da qilib, undan 2018-yil sentabr oyida 50 ming dollarni olib, shaxsiy ehtiyojlari uchun ishlatib yuborgan.

Shuningdek, sudlanuvchi advokat o‘zining jinoiy harakatlarini davom ettirib, Navoiy viloyati, Qiziltepa tumani 5-sonli jazoni ijro etish koloniyasida jazo muddatini o‘tayotgan mahkum Sh.A. bilan uchrashgan. Unga sog‘lig‘i tufayli 2-guruh nogironligi toifasi berilganidan xabar topib, bu go‘yoki uning xizmatlari evaziga amalga oshirilganini, bundan mahkumga nisbatan qo‘llanilgan jazo chorasini yengilroq turdagi jazo chorasiga o‘zgartirishda vosita sifatida foydalanishni ro‘kach qilib, mahkumning turmush o‘rtog‘idan yana 1000 dollar olgan.

Berilgan va’da bajarilmagach, Shavkat Hatamov advokatdan 50 ming dollarni qaytarishni talab qilgan. Advokat esa pullarni mahkumni ozodlikka chiqarib berish evaziga O‘zbekiston Respublikasi Oliy sudida ishlovchi mansabdor shaxslarga berganini aytgan. Va pullarni qaytarishni paysalga solgan.

Sud mazkur jinoyat ishini ko‘rib chiqib, advokatni Jinoyat kodeksining 168-moddasi 4-qismi “a” bandi (juda ko‘p miqdorda firibgarlik) va 28, 211-moddasi 3-qismi “a” bandi (pora berish) bilan ayblab, uni ikki yil muddatga Advokatlar palatasi tuzilmalarida advokatlik faoliyati bilan shug‘ullanish huquqidan mahrum qilib, yetti yil muddatga ozodlikdan mahrum qilgan.