Farg‘ona viloyatida tadbirkorga energetik ichimlik dilerligini va’da qilib, uni chuv tushirgan shaxsga jinoyat ishi qo‘zg‘atildi, deb xabar beradi Bosh prokuratura huzuridagi Departament.

Ma’lum qilinishicha, Departamentning Oltiariq tuman bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan. Tekshiruv davomida Q.Z. ismli shaxs tadbirkor S.ning ishonchiga kirib, unga Flash energetik ichimligi dilerligi va katta miqdorda ichimliklarni olib berishni va’da qilgani aniqlangan. U tadbirkorning 189,6 million so‘m va 7,5 ming dollarini firibgarlik yo‘li bilan qo‘lga kiritgan.

Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Qashqadaryoda o‘zini prokuratura xodimi deb tanishtirib, odamlarni chuv tushirgan sobiq IIB xodimi va uning sherigi qo‘lga olingani, Facebook’da o‘zini Korrupsiyaga qarshi kurashish agentligi xodimi sifatida tanishtirgan shaxs fuqaroni 11 ming dollarga chuv tushirgani, Toshkentda Mudofaa vazirligiga tegishli binoning ta’mirlash ishlarini olib berish evaziga qurilish firmasi boshlig‘idan 30 ming dollar olayotgan shaxslar ushlangani to‘g‘risida xabar berilgandi.