London Qirollik sudi ikki yil avval shahardagi millionerlarning xonadonlaridan 26 million funt sterling (34 million dollar) miqdoridagi boyliklarni o‘g‘irlagan uch nafar Italiya fuqarosi ustidan hukm o‘qidi. Bu haqda Daily Mail xabar berdi.
Nashr ma’lumotlariga ko‘ra, Yugoslav Yovanovich, Alessandro Malteze va Alessandro Donati ismli shaxslar Buyuk Britaniya tarixidagi eng yirik o‘g‘riliklarni sodir etib, mashhurlarning uylaridan millionlab funt sterling pul, zargarlik buyumlari va qimmatbaho toshlarni o‘margani uchun Islevort Crown Court sudida 28 yillik qamoq jazosiga hukm qilingan.
“Formula-1” sobiq bosh rahbarining qizi Tamara Ekklstoun, “Chelsi”ning sobiq futbolchisi Frenk Lempard va avvalroq vafot etgan tailandlik milliarder Vishaya Shrivaddanaprabxining uylari 2019-yilda sodir etilgan bir qator talonchiliklar qurboni bo‘lgan. Ushbu o‘g‘irliklar Britaniya jinoyat tarixidagi eng yirigi deb ataladi.
Yovanovich, Malteze va Donati Italiyadan ekstraditsiya qilingan. Ular 2019-yil 29-noyabrdan 18-dekabrgacha bo‘lgan davrdagi uchta talonchilik bilan bog‘liq o‘g‘riliklarni amalga oshirish uchun til biriktirganiga iqror bo‘ldi. Erkaklar sudga qurolli politsiya qo‘riqchilari kuzatuvi bilan vertolyotda olib kelingan. Buyuk Britaniyada jinoyat ishi bo‘yicha sud jarayoni tugagandan so‘ng ular jazoni o‘tash uchun Italiyaga qaytariladi.
Qaroqchilar jinoyat joyida barmoq izlari yoki DNK namunalarini qoldirmagan, shuning uchun politsiya ularni “arvohlar to‘dasi” deb atagan. Politsiya 1000 dan ortiq taksi haydovchilari bilan suhbatlashgandan keyingina jinoyatchilarning iziga tusha oldi.
Avvalroq AQShda eng ko‘p qidirilgan o‘g‘rilardan birining shaxsi 50 yildan keyin aniqlangan edi. Teodor Konrad 1969-yilda bankda ishlagan va 215 ming dollar (hozirgi qiymatda 1,6 million dollar) o‘margan. Erkakni javobgarlikka tortishning iloji bo‘lmadi: u may oyida saraton kasalligidan vafot etgan.
Izoh (0)