Kanadaning Britaniya Kolumbiyasida dam olish kunlaridan buyon davom etayotgan kuchli yog‘ingarchilik bir nechta hududda suv toshqinlari va ko‘chkilarni yuzaga keltirdi, ayrim joylardagi avtomobillar va temiryo‘llarga zarar yetgan, deb xabar beradi “Interfaks”. Provinsiyada ommaviy evakuatsiya boshlangan. Rasmiylar ushbu yog‘ingarchilikni “100 yil ichidagi eng yomon dovul” deb atamoqda.
Ko‘chkilar sabab bir nafar ayol halok bo‘lgan, uning jasadi 15-noyabr kuni Vankuverdan 250 kilometr uzoqlikdagi trassadan topilgan. Politsiya yo‘llarni suv bosishi va ko‘chkilar oqibatida qancha avtomobilga zarar yetganini bilmaydi, ammo ular tabiiy ofatning boshqa qurbonlari bo‘lishi mumkinligini istisno etmayapti. Ikki kishi bedarak yo‘qolgani aytilmoqda.
Britaniya Kolumbiyasi bosh vaziri o‘rinbosari va jamoat xavfsizligi vaziri Mayk Farnuort vaziyatni “ekstremal ob-havo hodisasi” deb atagan va dovul kutilganidan ko‘proq zarar keltirganini tan olgan. Mintaqa transport vaziri Maykl Fleming to‘fonni “100 yil ichidagi eng yomon” deb atagan.
Ko‘chkilar provinsiyani Kanadaning boshqa hududlari bilan birlashtiruvchi uchta asosiy yo‘lni yopib qo‘ygan, Vankuver bilan transport aloqasi qisman uzilgan, shahar va dalalarni suv bosgan. Kanadadagi eng yirik hisoblanuvchi Vankuver porti ishini to‘xtatgan. Merritt shahri rasmiylari aholini to‘liq evakuatsiya qilish bo‘yicha topshiriq bergan (7 ming kishi): shaharda ko‘prik qulagan va kanalizatsiya tizimi ishdan chiqqan. To‘g‘on yorilgan Prinston shahrini ham qisman suv bosgan. Ko‘chkilar sabab to‘silib qolgan Agassiz shaharchasi rasmiylari 300 kishini evakuatsiya qilish uchun vertolyotlarni yo‘naltirgan.
16-noyabr kuni yog‘ingarchilik biroz kamaygach va hudud “qurishni” boshlaganida Abbotsford shahri atrofidagi vaziyat yomonlashgani va u yerdan odamlar evakuatsiya qilinayotgani e’lon qilingan. Yo‘llarning qayta tiklanishiga qancha vaqt ketishi hozircha aytilmayapti ham.
Ma’lumotlarga ko‘ra, Britaniya Kolumbiyasining ayrim hududlarida 252 millimetrgacha yog‘ingarchilik kuzatilgan.
Mamlakat bosh vaziri Jastin Tryudo hozirda Ottavada bo‘lib, vaziyatni kuzatib borayotgani va jabr ko‘rgan provinsiyaga zaruriy barcha yordam ko‘rsatishini ma’lum qilgan.
Eslatib o‘tamiz, yozda Britaniya Kolumbiyasida rekord darajada jazirama va yong‘inlar kuzatilgan, anomal ob-havo oqibatida 500 dan ortiq odam halok bo‘lgan edi.
Izoh (0)