Chexiya va Slovakiyada bir vaqtning o‘zida koronavirus bilan kunlik kasallanish bo‘yicha antirekordlar qayd etildi. Boshqa Yevropa davlatlari ham infeksiya tarqalishi tezlashgani haqida xabar bermoqda.
Chexiya Respublikasida o‘tgan bir kecha-kunduzda COVID-19 ga chalinganlar soni yana 22 479 kishiga ortdi, bu o‘tgan hafta qayd etilgan ko‘rsatkichdan deyarli 8 000 taga ko‘p. Mamlakatda kunlik kasallanish bo‘yicha avvalgi antirekord 7-yanvar kuni o‘rnatilgan edi. Bir hafta ichida Chexiyadagi kasallanishlarning o‘sishi har 100 ming kishiga 558 tadan 813 taga ko‘tarildi.
Chexiya bosh vaziri Andrey Babishning ta’kidlashicha, hukumat Avstriyadan o‘rnak olib, cheklovlar kiritish, jumladan, emlanmaganlar uchun qisman lokdaun joriy qilish imkoniyatini ko‘rib chiqmoqda.
Slovakiyada o‘tgan bir sutkada 8342 kishida koronavirus aniqlandi, avvalgi rekord 12-noyabrda o‘rnatilgandi — 7244 kishi. Mamlakat kasalxonalarda COVID-19 bilan kasallangan 2 879 kishi bor, ularning 81 foizi emlanmagan.
Slovakiya hukumati shifoxonalar yukini yengillashtirish uchun emlanmaganlarga cheklovlar joriy qilishni rejalashtirmoqda. Bosh vazir Eduard Xegerning ogohlantirishicha, emlanmagan odamlar uchun uch hafta davomida savdo markazlari, sport inshootlari va ommaviy tadbirlarga kirish cheklanishi mumkin.
Germaniya va Norvegiyadagi vaziyat
Germaniyada shifokorlar o‘tgan sutkada COVID-19 infeksiyasiga chalinish bo‘yicha qariyb 53 mingta holatni aniqladi — bu pandemiya boshidan beri rekord ko‘rsatkich.
Oxirgi 24 soat ichida Germaniyada 52 826 kishida koronavirus qayd etilgan, ushbu raqamlar bir hafta oldingiga nisbatan 13 150 taga ko‘p. Shuningdek, kasallikdan 294 ta o‘lim qayd etilgan.
18-noyabr kuni Germaniya federal shtatlarining rahbarlari koronavirusning to‘rtinchi to‘lqiniga qarshi kurashish bo‘yicha ehtimoliy chora-tadbirlarni muhokama qilishni rejalashtirmoqda.
Deutsche Welle’ning yozishicha, bu niqob taqish bo‘yicha qat’iy qoidalar, muayyan tadbirlar yoki joylarga tashrif buyurganda emlanganlik yoki kasallanib o‘tganlikni tasdiqlovchi hujjatlarni taqdim etish talabi bo‘lishi mumkin.
Hozirgacha mamlakat aholisining qariyb 67,5 foizi vaksinaning ikkala dozasini ham olgan. Biroq ekspertlarning ta’kidlashicha, bu yetarli emas. O‘tgan hafta mamlakat bosh virusologi Kristian Drosten agar vaksinatsiya darajasi oshirilmasa va qattiqroq choralar ko‘rilmasa, qishda mamlakatda 100 mingga yaqin odam COVID-19 dan o‘lim topishi mumkinligi haqida ogohlantirgan edi.
Germaniyada pandemiyaning butun davri davomida 5,1 millionga yaqin kishida koronavirus qayd etilgan, 98 mingdan ortiq kishi infeksiya qurboni bo‘lgan.
Norvegiyada ham kunlik kasallanish bo‘yicha pandemiya boshidan beri maksimal o‘sish qayd etildi — 16-noyabr kuni yana 2 552 kishi infeksiya yuqtirgan.
Shu kuni mamlakat hukumati 65 yoshdan oshgan odamlarni koronavirusga qarshi emlashning asosiy kursi va ularga qo‘shimcha doza yuborish o‘rtasidagi oraliq muddatni olti oydan besh oygacha qisqartirdi. Vaksinaning kuchaytiruvchi dozasini olish huquqiga ega bo‘lganlar bu haqda SMS orqali xabardor qilinadi. Umuman olganda, mamlakat aholisining 90 foizdan ortig‘i COVID-19 vaksinasining bitta dozasini, 87,3 foizi esa ikkala dozasini ham olgan.
Norvegiyada koronavirus cheklovlari sentabr oyida butunlay bekor qilingandi.
Jahon sog‘liqni saqlash tashkiloti o‘zining haftalik hisobotida Yevropada bir hafta ichida COVID-19 dan o‘limlar soni 5 foizga oshganini qayd etdi. JSST Yevropani ushbu ko‘rsatkich o‘sib borayotgan yagona qit’a deb atadi. G‘arbiy Yevropa mamlakatlarida aholining qariyb 60 foizi to‘liq emlangan, Sharqiy Yevropada bu ko‘rsatkich odamlarning vaksinaga ishonmasligi fonida ikki baravar kam.
Izoh (0)