Чехия ва Словакияда бир вақтнинг ўзида коронавирус билан кунлик касалланиш бўйича антирекордлар қайд этилди. Бошқа Европа давлатлари ҳам инфекция тарқалиши тезлашгани ҳақида хабар бермоқда.
Чехия Республикасида ўтган бир кеча-кундузда COVID-19 га чалинганлар сони яна 22 479 кишига ортди, бу ўтган ҳафта қайд этилган кўрсаткичдан деярли 8 000 тага кўп. Мамлакатда кунлик касалланиш бўйича аввалги антирекорд 7 январь куни ўрнатилган эди. Бир ҳафта ичида Чехиядаги касалланишларнинг ўсиши ҳар 100 минг кишига 558 тадан 813 тага кўтарилди.
Чехия бош вазири Андрей Бабишнинг таъкидлашича, ҳукумат Австриядан ўрнак олиб, чекловлар киритиш, жумладан, эмланмаганлар учун қисман локдаун жорий қилиш имкониятини кўриб чиқмоқда.
Словакияда ўтган бир суткада 8342 кишида коронавирус аниқланди, аввалги рекорд 12 ноябрда ўрнатилганди — 7244 киши. Мамлакат касалхоналарда COVID-19 билан касалланган 2 879 киши бор, уларнинг 81 фоизи эмланмаган.
Словакия ҳукумати шифохоналар юкини енгиллаштириш учун эмланмаганларга чекловлар жорий қилишни режалаштирмоқда. Бош вазир Эдуард Хегернинг огоҳлантиришича, эмланмаган одамлар учун уч ҳафта давомида савдо марказлари, спорт иншоотлари ва оммавий тадбирларга кириш чекланиши мумкин.
Германия ва Норвегиядаги вазият
Германияда шифокорлар ўтган суткада COVID-19 инфекциясига чалиниш бўйича қарийб 53 мингта ҳолатни аниқлади — бу пандемия бошидан бери рекорд кўрсаткич.
Охирги 24 соат ичида Германияда 52 826 кишида коронавирус қайд этилган, ушбу рақамлар бир ҳафта олдингига нисбатан 13 150 тага кўп. Шунингдек, касалликдан 294 та ўлим қайд этилган.
18 ноябрь куни Германия федерал штатларининг раҳбарлари коронавируснинг тўртинчи тўлқинига қарши курашиш бўйича эҳтимолий чора-тадбирларни муҳокама қилишни режалаштирмоқда.
Deutsche Welle’нинг ёзишича, бу ниқоб тақиш бўйича қатъий қоидалар, муайян тадбирлар ёки жойларга ташриф буюрганда эмланганлик ёки касалланиб ўтганликни тасдиқловчи ҳужжатларни тақдим этиш талаби бўлиши мумкин.
Ҳозиргача мамлакат аҳолисининг қарийб 67,5 фоизи вакцинанинг иккала дозасини ҳам олган. Бироқ экспертларнинг таъкидлашича, бу етарли эмас. Ўтган ҳафта мамлакат бош вирусологи Кристиан Дростен агар вакцинация даражаси оширилмаса ва қаттиқроқ чоралар кўрилмаса, қишда мамлакатда 100 мингга яқин одам COVID-19 дан ўлим топиши мумкинлиги ҳақида огоҳлантирган эди.
Германияда пандемиянинг бутун даври давомида 5,1 миллионга яқин кишида коронавирус қайд этилган, 98 мингдан ортиқ киши инфекция қурбони бўлган.
Норвегияда ҳам кунлик касалланиш бўйича пандемия бошидан бери максимал ўсиш қайд этилди — 16 ноябрь куни яна 2 552 киши инфекция юқтирган.
Шу куни мамлакат ҳукумати 65 ёшдан ошган одамларни коронавирусга қарши эмлашнинг асосий курси ва уларга қўшимча доза юбориш ўртасидаги оралиқ муддатни олти ойдан беш ойгача қисқартирди. Вакцинанинг кучайтирувчи дозасини олиш ҳуқуқига эга бўлганлар бу ҳақда SMS орқали хабардор қилинади. Умуман олганда, мамлакат аҳолисининг 90 фоиздан ортиғи COVID-19 вакцинасининг битта дозасини, 87,3 фоизи эса иккала дозасини ҳам олган.
Норвегияда коронавирус чекловлари сентябрь ойида бутунлай бекор қилинганди.
Жаҳон соғлиқни сақлаш ташкилоти ўзининг ҳафталик ҳисоботида Европада бир ҳафта ичида COVID-19 дан ўлимлар сони 5 фоизга ошганини қайд этди. ЖССТ Европани ушбу кўрсаткич ўсиб бораётган ягона қитъа деб атади. Ғарбий Европа мамлакатларида аҳолининг қарийб 60 фоизи тўлиқ эмланган, Шарқий Европада бу кўрсаткич одамларнинг вакцинага ишонмаслиги фонида икки баравар кам.
Изоҳ (0)